വയനാട്: അന്തരിച്ച പത്മശ്രീ ചെറുവയൽ രാമന്റെ കുടുംബത്തെ സന്ദർശിച്ച് വയനാട് എം.പി പ്രിയങ്ക ഗാന്ധി. വയനാട് കമ്മനയിലെ വീട്ടിലെത്തിയാണ് കുടുംബാംഗങ്ങളെ നേരിൽ കണ്ട് അനുശോചനം അറിയിച്ചത്. രാമേട്ടന്റെ വിയോഗം അപ്രതീക്ഷിതമായിരുന്നുവെന്ന് പ്രിയങ്ക ഗാന്ധി പറഞ്ഞു.
വിവിധ പരിപാടികളിൽ പങ്കെടുക്കുന്നതിനായി ഇന്നലെ രാത്രിയാണ് പ്രിയങ്ക ഗാന്ധി മണ്ഡലത്തിലെത്തിയത്. സന്ദർശനത്തിലെ ആദ്യ പരിപാടിയായാണ് ചെറുവയൽ രാമന്റെ വീട്ടിലെത്തിയത്. അരമണിക്കൂറോളം കുടുംബാംഗങ്ങൾക്കൊപ്പം ചെലവഴിച്ചു.
കഴിഞ്ഞ മാസം 14നാണ് ആരോഗ്യപ്രശ്നങ്ങളെ തുടർന്ന് പത്മശ്രീ ചെറുവയൽ രാമൻ അന്തരിച്ചത്. വിയോഗത്തിന് പിന്നാലെ ഫേസ്ബുക്ക് പോസ്റ്റിലൂടെ പ്രിയങ്ക ഗാന്ധി അനുശോചനം രേഖപ്പെടുത്തിയിരുന്നു. കുടുംബാംഗങ്ങളെ ഫോണിൽ വിളിച്ചും ദുഃഖം അറിയിച്ചിരുന്നു.
തിരക്കുകൾ കാരണം സംസ്കാരച്ചടങ്ങിൽ പങ്കെടുക്കാൻ കഴിയാതിരുന്ന പ്രിയങ്ക ഗാന്ധി, മണ്ഡലത്തിലെത്തിയപ്പോഴാണ് കുടുംബത്തെ നേരിൽ സന്ദർശിച്ചത്.
