ദീപാവലി ആഘോഷങ്ങൾക്ക് പിന്നാലെ വിഷപ്പുകയിൽ മുങ്ങി രാജ്യതലസ്ഥാനം. ഡൽഹിയിലെ പലയിടങ്ങളിലും വായു ഗുണനിലവാര സൂചിക 500 കടന്ന് അതീവ ഗുരുതരാവസ്ഥയിലെത്തി. ദൃശ്യപരിധി കുറഞ്ഞത് റോഡ് ഗതാഗതത്തെയും ബാധിച്ചു. ഹരിത പടക്കങ്ങൾ മാത്രം ഉപയോഗിക്കണമെന്ന ഉത്തരവ് വ്യാപകമായി ലംഘിക്കപ്പെട്ടതായാണ് റിപ്പോർട്ട്. മലിനീകരണം നിയന്ത്രിക്കാൻ കൂടുതൽ നടപടികൾ സ്വീകരിക്കാനൊരുങ്ങുകയാണ് സർക്കാർ.
അതിനിടെ, ദീപാവലി ആഘോഷങ്ങൾക്കിടെ മുംബൈയിലും വിവിധയിടങ്ങളിൽ വ്യാപക തീപിടിത്തമുണ്ടായി. ഡോംഗ്രിയിലുണ്ടായ വൻ തീപിടിത്തത്തിൽ നിരവധി കടകളും കുടിലുകളും കത്തിനശിച്ചു. വിരാറിലും താനെയിലും റെസിഡൻഷ്യൽ കെട്ടിടങ്ങൾക്ക് തീപിടിച്ചു. താനെയിൽ തീപിടിത്തമുണ്ടായ കെട്ടിടത്തിലേക്ക് ഉപമുഖ്യമന്ത്രി ഏകനാഥ് ഷിൻഡെ നേരിട്ടെത്തി. നവിമുംബൈയിലെ തുർബെയിൽ ഷോപ്പിങ് സെന്ററിലും തീപിടിത്തമുണ്ടായി. സോഫ നിർമാണ യൂണിറ്റിന് മുകളിൽ പടക്കം വീണതാണ് തീപിടിത്തത്തിന് കാരണമായത്.
