കൊച്ചി തുറമുഖ മേഖലയിലെ റെയിൽപാതയിൽ നിന്ന് പാളം മോഷ്ടിച്ച കേസിൽ മൂന്ന് പേരെ എറണാകുളം സൗത്ത് ആർപിഎഫ് അറസ്റ്റ് ചെയ്തു. വൈപ്പിൻ സ്വദേശി പി. കെ. അഫ്സൽ, മട്ടാഞ്ചേരി സ്വദേശി പി. ഐ. താജുദ്ദീൻ, അസം സ്വദേശി ചന്ദ്രശേഖർ മാലിക് എന്നിവരാണ് പിടിയിലായത്.
കൊച്ചി പോർട്ട് ട്രസ്റ്റിന്റെ ഉടമസ്ഥതയിലുള്ള, നിലവിൽ ട്രെയിൻ സർവീസുകളില്ലാത്ത ഐലൻഡ് റെയിൽപാതയിൽ നിന്ന് ഏകദേശം അര കിലോമീറ്ററോളം പാളമാണ് മുറിച്ചുമാറ്റിയത്.
പാളങ്ങൾ കഷണങ്ങളാക്കി ആക്രിക്കട വഴി വിറ്റഴിക്കാനായിരുന്നു പ്രതികളുടെ ശ്രമമെന്നാണ് ആർപിഎഫിന്റെ കണ്ടെത്തൽ. തിങ്കളാഴ്ച രാത്രി ആലുവ മാർക്കറ്റിന് സമീപത്ത് നിന്നാണ് പ്രതികളെ കസ്റ്റഡിയിലെടുത്തത്.
തുടർന്ന് നടത്തിയ പരിശോധനയിൽ മോഷ്ടിച്ച പാളങ്ങളുടെ 400-ഓളം കഷണങ്ങൾ കണ്ടെത്തി. ഇവ കടത്താൻ ഉപയോഗിച്ച ലോറിയും ഗ്യാസ് കട്ടറും ആർപിഎഫ് പിടിച്ചെടുത്തു.
സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് പ്രതികളെ തിരിച്ചറിഞ്ഞത്. സംഭവത്തിൽ അന്വേഷണം തുടരുകയാണെന്ന് ആർപിഎഫ് അറിയിച്ചു.
