കോഴിക്കോട്: നഗരത്തിലെ കെഎസ്ആർടിസി ബസ് സ്റ്റാൻഡിൽ മേൽക്കൂരയിലെ സീലിങ് അടർന്നുവീണ് രണ്ട് യാത്രക്കാർക്ക് പരിക്ക്. ഇന്ന് പുലർച്ചെയായിരുന്നു സംഭവം. ബസ് കാത്തിരിപ്പ് കേന്ദ്രത്തിൽ ബസിനായി കാത്തിരുന്ന യാത്രക്കാരുടെ മേലേക്കാണ് സീലിങ് തകർന്നു വീണത്.
കായംകുളം സ്വദേശി മധു, മാനന്തവാടി സ്വദേശി അജിത് എന്നിവർക്കാണ് അപകടത്തിൽ പരിക്കേറ്റത്. കെഎസ്ആർടിസി സ്റ്റാൻഡിലെ കാത്തിരിപ്പ് കേന്ദ്രത്തിലെ കസേരകളിൽ ഇവർ ഇരിക്കുമ്പോഴായിരുന്നു പെട്ടെന്ന് മുകളിൽ നിന്നും വലിയ രീതിയിൽ സീലിങ് അടർന്ന് വീണത്. തുടർച്ചയായ പകർച്ചവ്യാധി ഭീതി നിലനിൽക്കുന്ന ജില്ലയിൽ, കെഎസ്ആർടിസി സ്റ്റാൻഡിലെ ഈ സുരക്ഷാവീഴ്ച യാത്രക്കാർക്കിടയിൽ വലിയ ആശങ്കയ്ക്കും പ്രതിഷേധത്തിനും കാരണമായിട്ടുണ്ട്. പരിക്കേറ്റവരെ ഉടൻ തന്നെ ആശുപത്രിയിൽ പ്രവേശിപ്പിച്ചു. സംഭവത്തിൽ കൂടുതൽ വിവരങ്ങൾ ലഭ്യമായി വരുന്നതേയുള്ളൂ.
