സാധാരണക്കാർക്ക് വീണ്ടും ഇരുട്ടടി; സബ്‌സിഡിയുള്ള പാചകവാതക സിലിണ്ടറുകളുടെ എണ്ണം നാലായി കുറച്ചു

ന്യൂഡൽഹി: രാജ്യത്തെ സാധാരണക്കാരായ ജനങ്ങൾക്ക് മേൽ വീണ്ടും അധികഭാരം അടിച്ചേൽപ്പിച്ച് കേന്ദ്ര സർക്കാർ തീരുമാനം. പ്രധാനമന്ത്രി ഉജ്ജ്വൽ യോജന ഗുണഭോക്താക്കൾക്ക് പ്രതിവർഷം ലഭിച്ചിരുന്ന സബ്‌സിഡിയുള്ള പാചകവാതക സിലിണ്ടറുകളുടെ എണ്ണം വെറും നാലായി വെട്ടിച്ചുരുക്കി. നേരത്തെ ഇത് പ്രതിവർഷം 9 സിലിണ്ടറുകളായിരുന്നു. ഗാർഹിക സിലിണ്ടറുകളുടെ വില വർദ്ധിപ്പിച്ചതിന് തൊട്ടുപിന്നാലെയാണ് സബ്‌സിഡി സിലിണ്ടറുകളുടെ എണ്ണത്തിലും നിയന്ത്രണം കൊണ്ടുവന്നിരിക്കുന്നത്. പശ്ചിമേഷ്യൻ സംഘർഷത്തിന്റെ പശ്ചാത്തലത്തിലാണ് ഈ പുതിയ നടപടി.

2016-ൽ ഉജ്ജ്വല യോജന പദ്ധതി പ്രഖ്യാപിച്ച സമയത്ത് പ്രതിവർഷം ഒരു ഗുണഭോക്താവിന് 12 സിലിണ്ടറുകൾ വരെ സബ്‌സിഡി നിരക്കിൽ ലഭിച്ചിരുന്നു. പിന്നീട് ഇത് 9 ആയി സർക്കാർ കുറച്ചിരുന്നു. ഇതിന് പിന്നാലെയാണ് ഇപ്പോൾ വീണ്ടും വെട്ടിച്ചുരുക്കി വെറും നാലാക്കി മാറ്റിയിരിക്കുന്നത്.

തീരുമാനത്തിന് പിന്നിൽ എണ്ണക്കമ്പനികളുടെ നഷ്ടം

14.2 കിലോഗ്രാം എൽപിജി റീഫിൽ ചെയ്യുമ്പോൾ പൊതുമേഖലാ എണ്ണക്കമ്പനികൾക്ക് ഇപ്പോഴും വലിയ നഷ്ടം സംഭവിക്കുന്നുണ്ടെന്നാണ് പെട്രോളിയം മന്ത്രാലയം ചൂണ്ടിക്കാണിക്കുന്നത്. മന്ത്രാലയത്തിന്റെ കണക്കുകൾ പ്രകാരം:

• ഒരു എൽപിജി സിലിണ്ടറിന്: 700 രൂപ നഷ്ടം
• പെട്രോൾ (ലിറ്ററിന്): 6 രൂപ നഷ്ടം
• ഡീസൽ (ലിറ്ററിന്): 30 രൂപ നഷ്ടം

ഗാർഹിക സിലിണ്ടർ വിലയിലും വർദ്ധനവ്

കഴിഞ്ഞ ഞായറാഴ്ച ഗാർഹിക സിലിണ്ടറുകൾക്ക് 29 രൂപ വർദ്ധിപ്പിച്ചിരുന്നു. മൂന്ന് മാസത്തിനിടെ ഇത് രണ്ടാം തവണയാണ് വില കൂട്ടുന്നത്. പുതിയ നിരക്കുകൾ പ്രകാരം രാജ്യത്തെ പ്രധാന നഗരങ്ങളിലെ വില നിലവാരം താഴെ പറയുന്ന രീതിയിലാണ്:

അന്താരാഷ്ട്ര തലത്തിൽ പശ്ചിമേഷ്യൻ സംഘർഷം അയവില്ലാതെ തുടരുന്നതാണ് ഈ വിലവർദ്ധനവിന് കാരണമായി പറയുന്നത്. എന്നാൽ ഇത്രയൊക്കെ വില വർദ്ധിപ്പിച്ചിട്ടും തങ്ങൾക്ക് മുന്നോട്ട് പോകാൻ വല്ലാത്ത പ്രയാസമാണെന്നാണ് എണ്ണ കമ്പനികളുടെ വാദം. ഇതോടൊപ്പം വാണിജ്യ സിലിണ്ടറുകളുടെ വിലയും കുത്തനെ കൂടിയതോടെ രാജ്യത്ത് ഹോട്ടൽ ഭക്ഷണത്തിന്റെ വിലയും വരും ദിവസങ്ങളിൽ കുതിച്ചുയരുമെന്നാണ് റിപ്പോർട്ടുകൾ.