തിരുവനന്തപുരം: യുഡിഎഫ് സർക്കാരിന്റെ ധവളപത്രത്തിന് മറുപടിയായി എൽഡിഎഫ് ഇന്ന് ബദൽ ധവളപത്രം പുറത്തിറക്കും. സർക്കാർ പുറത്തിറക്കിയ ധവളപത്രത്തിലെ അവകാശവാദങ്ങൾ വസ്തുതാപരമായി പരിശോധിക്കുകയാണ് ലക്ഷ്യമെന്ന് എൽഡിഎഫ് നേതൃത്വം അറിയിച്ചു.
എകെജി പഠന ഗവേഷണ കേന്ദ്രം തയ്യാറാക്കിയ ധവളപത്രം വൈകിട്ട് നാല് മണിക്ക് എകെജി മിനിഹാളിൽ പ്രതിപക്ഷ നേതാവ് പിണറായി വിജയൻ പ്രകാശനം ചെയ്യും. സിപിഐഎം സംസ്ഥാന സെക്രട്ടറി എം.വി. ഗോവിന്ദനും മറ്റ് നേതാക്കളും ചടങ്ങിൽ പങ്കെടുക്കും.
സംസ്ഥാനം കടക്കെണിയിലാണെന്ന യുഡിഎഫ് പ്രചാരണത്തിന് മറുപടി നൽകുന്നതിനൊപ്പം, കഴിഞ്ഞ പത്ത് വർഷത്തിനിടെ എൽഡിഎഫ് ഭരണകാലത്ത് നടപ്പാക്കിയ വികസന പദ്ധതികൾ ജനങ്ങൾക്ക് മുന്നിൽ അവതരിപ്പിക്കുകയാണ് ബദൽ ധവളപത്രത്തിന്റെ ലക്ഷ്യമെന്ന് നേതൃത്വം വ്യക്തമാക്കി.
അതേസമയം, സിപിഐഎം സംസ്ഥാന സെക്രട്ടേറിയറ്റും ഇന്ന് ചേരും. ഡൽഹിയിൽ നടന്ന കേന്ദ്ര കമ്മിറ്റി യോഗത്തിന്റെ തുടർനടപടികളും വിഴിഞ്ഞം തുറമുഖ ഓഹരി കൈമാറ്റവുമായി ബന്ധപ്പെട്ട സമരപരിപാടികളും യോഗത്തിൽ ചർച്ചയാകും.
ഇതിനിടെ, സിപിഐ സംസ്ഥാന എക്സിക്യൂട്ടീവും ഇന്ന് യോഗം ചേരും. വിഴിഞ്ഞം തുറമുഖ ഓഹരി കൈമാറ്റവുമായി ബന്ധപ്പെട്ട് നിയമനടപടികൾ സ്വീകരിക്കുന്ന കാര്യം യോഗം തീരുമാനിക്കും.
