കണ്ണൂർ: പിഎം ശ്രീ പദ്ധതിയുമായി ബന്ധപ്പെട്ട് നിലപാട് വ്യക്തമാക്കി തദ്ദേശസ്വയംഭരണ വകുപ്പ് മന്ത്രി കെ.എം. ഷാജി. പിഎം ശ്രീ അറബിക്കടലിലല്ല, അഴുക്കുചാലിലാണ് വലിച്ചെറിയേണ്ടതെന്നും ഇക്കാര്യത്തിൽ അഭിപ്രായ വ്യത്യാസമില്ലെന്നും ഷാജി പറഞ്ഞു.
എന്നാൽ ഉത്തരവാദിത്തത്തിൽ നിൽക്കുമ്പോൾ ഒരാൾക്ക് മാത്രമായി തീരുമാനമെടുക്കാനാകില്ലെന്നും അദ്ദേഹം വ്യക്തമാക്കി. പിഎം ശ്രീ തന്റെ വകുപ്പിന്റെ പരിധിയിലായിരുന്നെങ്കിൽ പദ്ധതി തടയുമായിരുന്നുവെന്നും ഷാജി പറഞ്ഞു. കണ്ണൂരിൽ യൂത്ത് ലീഗ് സംഘടിപ്പിച്ച ഫ്രീഡം ടോക്ക് പരിപാടിയിലായിരുന്നു മന്ത്രിയുടെ പരാമർശം.
“പിഎം ശ്രീ അറബിക്കടലിലേക്ക് എറിയണം എന്ന് പറഞ്ഞത് എന്റെ രാഷ്ട്രീയ നിലപാടാണ്. എന്റെ വകുപ്പുമായി ബന്ധപ്പെട്ട കാര്യമല്ല. മന്ത്രിയായതുകൊണ്ട് ആ വകുപ്പിലെ കാര്യങ്ങൾ മാത്രമേ പറയാവൂ എന്നില്ല. അധികാരത്തിൽ വന്നതിനാൽ നിലപാട് മാറ്റിയിട്ടില്ല. ഉത്തരവാദിത്തം ഏറ്റെടുത്ത് നിൽക്കുമ്പോൾ നമുക്ക് മാത്രമായി ഒന്നും ചെയ്യാൻ കഴിയില്ല,” എന്നായിരുന്നു ഷാജിയുടെ വിശദീകരണം. യുഡിഎഫ് സർക്കാർ പിഎം ശ്രീ പദ്ധതിയുമായി മുന്നോട്ടുപോകുമ്പോഴും സ്വന്തം രാഷ്ട്രീയ നിലപാടിൽ മാറ്റമില്ലെന്ന് വ്യക്തമാക്കുന്നതിനാണ് ഷാജി ശ്രമിച്ചതെന്നാണ് വിലയിരുത്തൽ. നിലപാടും ഭരണപരമായ പരിമിതികളും വിശദീകരിക്കാൻ ന്യൂയോർക്ക് മേയർ സൊഹ്റാൻ മംദാനിയുടെ ഉദാഹരണവും ഷാജി ചൂണ്ടിക്കാട്ടി. അധികാരത്തിലെത്തുമ്പോൾ ചില രാഷ്ട്രീയ നിലപാടുകളിൽ പ്രായോഗികമായ മാറ്റങ്ങൾ വരുത്തേണ്ട സാഹചര്യമുണ്ടാകാമെന്നും അതിനർത്ഥം ഉയർത്തിപ്പിടിക്കുന്ന രാഷ്ട്രീയം ഉപേക്ഷിക്കണമെന്നല്ലെന്നും അദ്ദേഹം പറഞ്ഞു. പിഎം ശ്രീ പദ്ധതിയിൽ യുഡിഎഫ് മുന്നോട്ടുപോകാനുള്ള തീരുമാനത്തിന് പിന്നാലെയാണ് കെ.എം. ഷാജിയുടെ മുൻകാല പരാമർശങ്ങൾ വീണ്ടും ചർച്ചയായത്. പ്രതിപക്ഷത്തായിരുന്നപ്പോൾ പിഎം ശ്രീയെ അറബിക്കടലിലേക്ക് വലിച്ചെറിയണമെന്ന ഷാജിയുടെ പ്രസ്താവനയാണ് ഇപ്പോൾ പ്രതിപക്ഷം പ്രധാനമായും ആയുധമാക്കുന്നത്. പദ്ധതിയെച്ചൊല്ലി യുഡിഎഫിനുള്ളിലും ഭിന്നാഭിപ്രായങ്ങൾ ഉയരുന്നുണ്ട്. മുസ്ലിം ലീഗ് പിഎം ശ്രീയെ എതിർക്കുമ്പോൾ, കേന്ദ്ര ഫണ്ട് സ്വീകരിച്ചുകൊണ്ട് കേന്ദ്ര സിലബസ് നടപ്പാക്കാതെ പദ്ധതിയുമായി എങ്ങനെ മുന്നോട്ടുപോകാമെന്ന നിലപാടിലാണ് കോൺഗ്രസ് എന്നാണ് സൂചന.
