മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജിവെക്കണമെന്നാവശ്യപ്പെട്ടുള്ള പ്രതിഷേധം ദില്ലിയിൽ ശക്തമാകുന്നു. തെരുവിലിറങ്ങിയ ഇടത് യുവജന സംഘടനാ പ്രവർത്തകരെ പൊലീസ് ബലംപ്രയോഗിച്ച് നീക്കി. കൊണാട്ട് പ്ലേസിൽ എസ്.എഫ്.ഐ, ഡി.വൈ.എഫ്.ഐ, എ.ഐ.എസ്.എഫ് സംഘടനകളുടെ നേതൃത്വത്തിലായിരുന്നു പ്രതിഷേധം. പ്രവർത്തകരെ പൊലീസ് റോഡിലൂടെ വലിച്ചിഴച്ചതായും റിപ്പോർട്ടുണ്ട്. സമരത്തിനിടെ എസ്.എഫ്.ഐ ദേശീയ അധ്യക്ഷൻ ആദർശ് എം. സജിക്ക് പരിക്കേറ്റു. ഡി.വൈ.എഫ്.ഐ നേതാവ് ജെയ്ക്കിനെയും പൊലീസ് കസ്റ്റഡിയിലെടുത്തു. സി.ജെ.പി പ്രവർത്തകരും പ്രതിഷേധത്തിൽ അണിനിരന്നു. അതിനിടെ, ജോൺ ബ്രിട്ടാസ് എം.പിയെയും പൊലീസ് കസ്റ്റഡിയിലെടുത്തു.
ഗ്യാനേഷ് കുമാറിന്റെ രാജി ആവശ്യപ്പെട്ടുള്ള സമരം കൂടുതൽ ശക്തമാക്കാനാണ് ഇന്ത്യാ സഖ്യത്തിന്റെ നീക്കം. നാളെ ഉച്ചയ്ക്ക് യോഗം ചേർന്ന ശേഷം സുപ്രീംകോടതിയിലേക്ക് പ്രതിഷേധ മാർച്ച് നടത്തുന്നതും ചീഫ് ജസ്റ്റിസിന് നിവേദനം നൽകുന്നതും പരിഗണനയിലുണ്ട്. ഗ്യാനേഷ് കുമാറിനെ പുറത്താക്കണമെന്നാവശ്യപ്പെട്ട് രാഷ്ട്രപതിക്കും നേരത്തേ നിവേദനം നൽകിയിരുന്നു.
ഗ്യാനേഷ് കുമാർ രാജിവെക്കുന്നതുവരെ സമരം തുടരുമെന്നാണ് കോൺഗ്രസ് നിലപാട്. അതേസമയം, സി.ജെ.പി സമരത്തോടുള്ള സമീപനത്തിൽ പ്രതിപക്ഷ കക്ഷികൾക്കിടയിൽ വ്യത്യസ്ത നിലപാടുകളുണ്ട്. സി.ജെ.പിക്കും ഇന്ത്യാ സഖ്യത്തിനുമൊപ്പം പ്രതിഷേധത്തിൽ പങ്കെടുക്കുമെന്ന നിലപാടാണ് സി.പി.എം സ്വീകരിച്ചിരിക്കുന്നത്. സി.ജെ.പി സമരം പ്രതിപക്ഷ പ്രതിഷേധത്തെ ദുർബലപ്പെടുത്താനാണെന്നാണ് കോൺഗ്രസിന്റെ വിലയിരുത്തൽ.
ദില്ലിയിൽ പ്രതിഷേധം ശക്തമാകുന്നതിനിടെ, സമരക്കാരെ നേരിടുന്ന പൊലീസ് നടപടിക്കെതിരെയും വിമർശനം ഉയരുന്നുണ്ട്. വരും ദിവസങ്ങളിൽ ഇന്ത്യാ സഖ്യം പ്രതിഷേധം കൂടുതൽ വ്യാപിപ്പിക്കുമെന്നാണ് സൂചന.
