പാലക്കാട്: അട്ടപ്പാടിയിൽ വീണ്ടും ശിശുമരണം. ധോണിക്കുണ്ട് ഊരിലെ രാജി–സുനീഷ് ദമ്പതികളുടെ കുഞ്ഞാണ് പ്രസവത്തിന് പിന്നാലെ ഒരു മണിക്കൂറിനുള്ളിൽ മരിച്ചത്. അനീമിയയാണ് മരണകാരണമെന്നാണ് പ്രാഥമിക വിവരം.
അട്ടപ്പാടിയിൽ ശിശുമരണങ്ങൾ ആവർത്തിക്കുന്നത് ആശങ്ക ഉയർത്തുകയാണ്. ഇന്ന് പുലർച്ചെ മൂന്ന് മണിയോടെ കോഴിക്കോട് മെഡിക്കൽ കോളേജ് ആശുപത്രിയിൽ പ്രസവശേഷമാണ് കുഞ്ഞ് മരിച്ചത്. ഈ മാസം അട്ടപ്പാടിയിൽ റിപ്പോർട്ട് ചെയ്യുന്ന മൂന്നാമത്തെ ശിശുമരണമാണിത്.
കഴിഞ്ഞ ദിവസവും അട്ടപ്പാടിയിൽ ശിശുമരണം റിപ്പോർട്ട് ചെയ്തിരുന്നു. വടക്കോട്ടത്തറ സ്വദേശികളായ മുരുകേശിന്റെയും ശിവകാമിയുടെയും 15 ദിവസം പ്രായമുള്ള ആൺകുഞ്ഞാണ് മരിച്ചത്.
ഷോളയൂർ വെച്ചുപതി ഊന്നതിയിലെ ജ്യോതിമണിയുടെയും ബിജുവിന്റെയും 20 ദിവസം പ്രായമുള്ള ആൺകുഞ്ഞും ഈ മാസം 21-ന് തൃശൂർ മെഡിക്കൽ കോളേജ് ആശുപത്രിയിൽ മരിച്ചിരുന്നു.
അട്ടപ്പാടിയിൽ തുടർച്ചയായി ശിശുമരണങ്ങൾ ഉണ്ടാകുന്നതിന് പോഷകാഹാരക്കുറവാണ് കാരണമെന്ന ആരോപണവുമായി ഡിവൈഎഫ്ഐ ഉൾപ്പെടെയുള്ള പ്രതിപക്ഷ സംഘടനകൾ പ്രതിഷേധവുമായി രംഗത്തെത്തിയിരുന്നു.
ആവർത്തിക്കുന്ന ശിശുമരണങ്ങളുടെ പശ്ചാത്തലത്തിൽ മേഖലയിലെ ആരോഗ്യ-പോഷകാഹാര സാഹചര്യം വിശദമായി പരിശോധിക്കണമെന്ന ആവശ്യവും ശക്തമാകുകയാണ്. മരണങ്ങളുടെ യഥാർഥ കാരണങ്ങൾ കണ്ടെത്താനും പ്രതിരോധ നടപടികൾ ഉറപ്പാക്കാനും വിദഗ്ധ പഠനം വേണമെന്ന ആവശ്യവും ഉയരുന്നുണ്ട്.
