തിരുവനന്തപുരം: വർക്കലയിൽ വറ്റ മത്സ്യം കഴിച്ച് ഗുരുതരാവസ്ഥയിലായിരുന്ന യുവാവ് മരിച്ചു. വർക്കല സ്വദേശി സുധീർ (40) ആണ് മരിച്ചത്. കഴിഞ്ഞ മാസം 30-നാണ് ആരോഗ്യനില മോശമായതിനെ തുടർന്ന് സുധീറിനെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചത്. വെന്റിലേറ്ററിൽ ചികിത്സയിലിരിക്കെയാണ് മരണം.
വറ്റ മത്സ്യം കഴിച്ച 27 പേർ വിവിധ ആശുപത്രികളിൽ ചികിത്സ തേടിയിരുന്നു. ഗുരുതരാവസ്ഥയിലുള്ള ചിലക്കൂർ സ്വദേശി 17-കാരൻ ഹാഷിം പാരിപ്പള്ളി മെഡിക്കൽ കോളേജ് ആശുപത്രിയിൽ ചികിത്സയിലാണ്.
സംഭവത്തെ തുടർന്ന് മത്സ്യത്തിന്റെ സാമ്പിളുകൾ പരിശോധനയ്ക്ക് അയച്ചതായി ജില്ലാ മെഡിക്കൽ ഓഫീസർ അറിയിച്ചു. വെട്ടൂരിൽ വിറ്റ വറ്റ മത്സ്യം കഴിച്ചവർക്കാണ് ആരോഗ്യപ്രശ്നങ്ങൾ ഉണ്ടായത്. ഇതോടെ പ്രദേശത്ത് വറ്റ മത്സ്യത്തിന്റെ വിൽപ്പന നിർത്തിവെച്ചിരുന്നു.
തീരദേശ മേഖലയിൽ കഴിഞ്ഞ രണ്ട് ദിവസങ്ങളിലായി വറ്റ മത്സ്യത്തിന്റെ വലിയ ലഭ്യതയുണ്ടായിരുന്നു. വിപണിയിൽ നിന്ന് മത്സ്യം വാങ്ങി ഉപയോഗിച്ച ചിലർക്കാണ് ദേഹാസ്വാസ്ഥ്യം അനുഭവപ്പെട്ടത്. മത്സ്യം വാങ്ങുമ്പോൾ ജാഗ്രത പാലിക്കണമെന്നും ഭക്ഷ്യയോഗ്യമാണെന്ന് ഉറപ്പുള്ള മത്സ്യങ്ങൾ മാത്രമേ ഉപയോഗിക്കാവൂ എന്നും നഗരസഭ മുന്നറിയിപ്പ് നൽകി.
