ആലപ്പുഴ: നഗരത്തിൽ ദുരൂഹ സാഹചര്യത്തിൽ കടത്താൻ ശ്രമിച്ച 82 ചാക്ക് അരിയും 14 ചാക്ക് ഗോതമ്പും പോലീസ് പിടികൂടി. ധാന്യങ്ങൾ കൊണ്ടുപോകാൻ ഉപയോഗിച്ച വാഹനവും കസ്റ്റഡിയിലെടുത്തു. വാഹനത്തിലുണ്ടായിരുന്ന രണ്ടുപേർക്കെതിരെ കേസെടുത്തു.
ജില്ലയിലെ വിവിധ റേഷൻ കടകളിൽനിന്ന് ശേഖരിച്ച ധാന്യങ്ങൾ കാലടിയിലെ സ്വകാര്യ മില്ലിലേക്ക് കൊണ്ടുപോവുകയായിരുന്നുവെന്നാണ് വാഹനത്തിലുണ്ടായിരുന്നവർ പോലീസിന് നൽകിയ മൊഴി. എന്നാൽ, സിവിൽ സപ്ലൈസ് ഗോഡൗണിൽനിന്ന് കടത്തിയ ധാന്യങ്ങളാണോ പിടികൂടിയതെന്ന സംശയത്തിലാണ് പോലീസ്.
ജില്ലാ സപ്ലൈ ഓഫീസിന്റെ പരിശോധനയ്ക്കുശേഷമായിരിക്കും തുടർനടപടികൾ സ്വീകരിക്കുക.
ആലപ്പുഴ സൗത്ത് പോലീസ് സ്റ്റേഷനിൽനിന്ന് എസ്. ശ്യാംകുമാർ റിപ്പോർട്ട് ചെയ്യുന്നു.
