പത്തനംതിട്ട: കൂടൽ എലിക്കോട് മേഖലയിൽ കരിമ്പുലിയുടെ സാന്നിധ്യം സ്ഥിരീകരിച്ച് വനംവകുപ്പ്. നാട്ടുകാർ മൊബൈൽ ഫോണിൽ പകർത്തിയ ദൃശ്യങ്ങളിലാണ് കരിമ്പുലിയെ കണ്ടെത്തിയത്.
കലഞ്ഞൂർ പഞ്ചായത്തിലെ ഒമ്പതാം വാർഡിൽ എലിക്കോട് ഇരുക്കുഴി ഭാഗത്ത് ജനവാസമേഖലയ്ക്ക് സമീപം രണ്ട് തവണയാണ് കരിമ്പുലിയുടെ സാന്നിധ്യം ശ്രദ്ധയിൽപ്പെട്ടത്. കലഞ്ഞൂർ-കൂടൽ മേഖലയിൽ നേരത്തെയും പുലിയുടെ സാന്നിധ്യം റിപ്പോർട്ട് ചെയ്തിരുന്നു. കരിമ്പുലിക്ക് പുറമെ മറ്റൊരു പുലിയെയും ഇവിടെ കണ്ടതായി നാട്ടുകാർ പറയുന്നു.
മാസങ്ങളായി പുലിയുടെ സാന്നിധ്യം പ്രദേശത്ത് ആശങ്ക സൃഷ്ടിക്കുന്നുണ്ട്. നിലവിൽ മൂന്ന് പുലികൾ മേഖലയിലുണ്ടെന്നാണ് നാട്ടുകാരുടെ വിവരം. പുലിയെ പിടികൂടുന്നതിനായി വിവിധയിടങ്ങളിൽ കൂടുകൾ സ്ഥാപിച്ചിട്ടുണ്ടെങ്കിലും ഇതുവരെ പുലി കുടുങ്ങിയിട്ടില്ല.
വനമേഖലയോട് ചേർന്ന പ്രദേശമായതിനാൽ പുലിയുടെ സാന്നിധ്യം പതിവായിരിക്കുകയാണ്. ടാപ്പിങ് തൊഴിലാളികളാണ് ഏറ്റവും ഒടുവിൽ പുലിയെ കണ്ടത്. സ്വകാര്യ വ്യക്തികളുടെ പുരയിടങ്ങൾ കാടുകയറി കിടക്കുന്നതും ആശങ്ക വർധിപ്പിക്കുന്നതായി നാട്ടുകാർ പറയുന്നു.
പുലിയെ ഭയന്ന് വളർത്തുമൃഗങ്ങളെ വളർത്താൻ കഴിയാത്ത സാഹചര്യമാണെന്നും ചിലർ വളർത്തുമൃഗങ്ങളെ വിൽക്കുന്ന സ്ഥിതിയിലാണെന്നും നാട്ടുകാർ പറയുന്നു. പുലിയെ പിടികൂടാൻ അടിയന്തര നടപടി വേണമെന്നാണ് ആവശ്യം.
പുലിയുടെ സാന്നിധ്യം നിരീക്ഷിക്കുന്നതിനായി വനംവകുപ്പ് പ്രദേശത്ത് ക്യാമറകളും സ്ഥാപിച്ചിട്ടുണ്ട്.
