കൊച്ചി: പാസ്പോർട്ടിൽ നിന്ന് ജീവിതപങ്കാളിയുടെ പേര് നീക്കം ചെയ്യാൻ വിവാഹമോചന ഉത്തരവ് നിർബന്ധമല്ലെന്ന് കേരള ഹൈക്കോടതി. പാസ്പോർട്ട് ചട്ടങ്ങളിൽ ഇത്തരമൊരു നിബന്ധനയില്ലെന്ന് ജസ്റ്റിസ് മുരളി പുരുഷോത്തമൻ വ്യക്തമാക്കി.
തലാഖ് വഴി വിവാഹമോചനം നേടിയ തൃശൂർ സ്വദേശിനിയായ 28കാരിയാണ് മുൻ ഭർത്താവിന്റെ പേര് പാസ്പോർട്ടിൽ നിന്ന് ഒഴിവാക്കുന്നതിനായി ഹൈക്കോടതിയെ സമീപിച്ചത്. വിവാഹമോചന ഉത്തരവ് ഹാജരാക്കണമെന്ന പാസ്പോർട്ട് അധികൃതരുടെ നിർദേശത്തെയാണ് യുവതി ചോദ്യം ചെയ്തത്.
വിവാഹമോചന ഉത്തരവ് നിർബന്ധമാണെന്ന് വ്യക്തമാക്കുന്ന 2024ലെ ഓഫീസ് മെമ്മോറാണ്ടം നിലവിലുണ്ടെന്ന് കേന്ദ്രസർക്കാരിനുവേണ്ടി ഹാജരായ ഡെപ്യൂട്ടി സോളിസിറ്റർ ജനറൽ കോടതിയെ അറിയിച്ചു.
എന്നാൽ ഓഫീസ് മെമ്മോറാണ്ടം വഴി പാസ്പോർട്ട് ചട്ടങ്ങളിലെ വ്യവസ്ഥകൾ മറികടക്കാനാകില്ലെന്ന് ഹൈക്കോടതി വ്യക്തമാക്കി. പാസ്പോർട്ട് ചട്ടങ്ങളിൽ വിവാഹമോചന ഉത്തരവ് ഹാജരാക്കണമെന്ന വ്യവസ്ഥ ഒഴിവാക്കിയിട്ടുണ്ടെന്നും കോടതി ചൂണ്ടിക്കാട്ടി.
ഹർജിക്കാരിയുടെ അപേക്ഷ വീണ്ടും പരിഗണിച്ച് ഉചിതമായ തീരുമാനം എടുക്കാൻ റീജിയണൽ പാസ്പോർട്ട് ഓഫീസർക്ക് ഹൈക്കോടതി നിർദേശം നൽകി.
