കൽപ്പറ്റ: വയനാട്ടിൽ സ്വകാര്യ ബസുകളിലെ വിദ്യാർത്ഥി കൺസഷൻ നിരക്ക് വർധിപ്പിച്ചതിനെതിരെ പ്രതിഷേധം. കൽപ്പറ്റ ആർ.ടി.ഒ ഓഫീസിൽ എസ്എഫ്ഐ പ്രവർത്തകർ ഉപരോധ സമരം നടത്തി.
വിദ്യാർത്ഥികളിൽ നിന്ന് അനധികൃതമായി അധിക തുക ഈടാക്കുന്നതിനെതിരെ നടപടി വേണമെന്നാവശ്യപ്പെട്ടാണ് പ്രതിഷേധമെന്ന് എസ്എഫ്ഐ അറിയിച്ചു. വിദ്യാർത്ഥി കൺസഷൻ നിരക്ക് ഒരു രൂപയിൽ നിന്ന് മൂന്ന് രൂപയായി സ്വകാര്യ ബസ് ഉടമകൾ ഏകപക്ഷീയമായി വർധിപ്പിച്ചതിനെതിരെയാണ് സമരം.
ഇന്ന് രാവിലെ പതിനൊന്ന് മണിയോടെയാണ് പ്രവർത്തകർ ആർ.ടി.ഒ ഓഫീസിന് മുന്നിലെത്തി പ്രതിഷേധിച്ചത്. നിരക്ക് വർധന പിൻവലിക്കാൻ അധികൃതർ ഇടപെടാത്തതാണ് പ്രതിഷേധത്തിന് കാരണമെന്ന് എസ്എഫ്ഐ നേതാക്കൾ ആരോപിച്ചു.
വിദ്യാർത്ഥികളുടെ യാത്രാവകാശം സംരക്ഷിക്കാൻ സർക്കാർ അടിയന്തരമായി ഇടപെടണമെന്നും, സ്വകാര്യ ബസ് ഉടമകളുടെ തീരുമാനത്തിന് സർക്കാർ മൗനസമ്മതം നൽകുകയാണെന്നും നേതാക്കൾ കുറ്റപ്പെടുത്തി.
അതേസമയം, നാളെ മുതൽ പരിശോധനയ്ക്കായി പ്രത്യേക സ്ക്വാഡിനെ രംഗത്തിറക്കുമെന്ന് ഉദ്യോഗസ്ഥർ ഉറപ്പ് നൽകിയതായി എസ്എഫ്ഐ നേതാക്കൾ അറിയിച്ചു. ബസ് കൺസഷൻ നിരക്ക് കുറയ്ക്കുന്നതുവരെ സമരം തുടരുമെന്നാണ് സംഘടനയുടെ മുന്നറിയിപ്പ്.
വിദ്യാർത്ഥി കൺസഷൻ നിരക്ക് വർധന സംബന്ധിച്ച് സ്വകാര്യ ബസ് ഉടമകളുമായി ചർച്ച നടത്തി പരിഹാരം കാണുമെന്ന് ഗതാഗത മന്ത്രി നേരത്തെ ഉറപ്പ് നൽകിയിരുന്നെങ്കിലും തീരുമാനം ഉണ്ടാകാത്തതിനെ തുടർന്നാണ് പ്രതിഷേധം ശക്തമായത്.
