കായംകുളത്ത് വീട്ടിൽ അനധികൃതമായി സൂക്ഷിച്ചിരുന്ന 85 ലിറ്റർ സ്പിരിറ്റും തലയോട്ടിയോടുകൂടിയ രണ്ട് മാൻകൊമ്പുകളും എക്സൈസ് സംഘം പിടികൂടി. കൃഷ്ണപുരം ഓച്ചിറ ഞക്കനാൽ ആശാന്റെയ്യത്ത് അശോകന്റെ വീട്ടിൽ നടത്തിയ പരിശോധനയിലാണ് ഇവ കണ്ടെത്തിയത്.
ഷാപ്പുകളിൽ കള്ളിൽ കലർത്തുന്നതിനായി സ്പിരിറ്റ് ചില്ലറ വിൽപ്പന നടത്തിയിരുന്നതായാണ് എക്സൈസ് ഉദ്യോഗസ്ഥർ പറയുന്നത്.
എക്സൈസ് എൻഫോഴ്സ്മെന്റ് സ്ക്വാഡ് ചുമതലയുള്ള അസിസ്റ്റന്റ് എക്സൈസ് കമ്മീഷണർ ജി. കൃഷ്ണകുമാറിന് ലഭിച്ച രഹസ്യവിവരത്തിന്റെ അടിസ്ഥാനത്തിലായിരുന്നു പരിശോധന.
സർക്കിൾ ഇൻസ്പെക്ടർ ആർ.ജി. രാജേഷ്, ഗ്രേഡ് പ്രിവന്റീവ് ഓഫീസർ രജിത്ത് കെ.ആർ., സിവിൽ എക്സൈസ് ഓഫീസർ ഡ്രൈവർ വിനോജ് ഖാൻ സേട്ട്, കൊല്ലം ഐ.ബി. പ്രിവന്റീവ് ഓഫീസർ മനു ആർ. എന്നിവരും കായംകുളം എക്സൈസ് റേഞ്ച് സംഘവും സംയുക്തമായാണ് റെയ്ഡ് നടത്തിയത്.
