പാലക്കാട്: മുൻവൈരാഗ്യത്തെ തുടർന്ന് പൊലീസ് സ്റ്റേഷനിലേക്ക് ബിയർ കുപ്പിയെറിഞ്ഞ യുവാവ് പിടിയിൽ. കൊല്ലങ്കോട് പൊലീസ് സ്റ്റേഷനിലേക്ക് കുപ്പിയെറിഞ്ഞ ഊട്ടറ സ്വദേശി ബൈജുവിനെയാണ് പൊലീസ് പിടികൂടിയത്. 23കാരനായ ഇയാൾ ‘തത്തമ്മ ബൈജു’ എന്ന പേരിലാണ് അറിയപ്പെടുന്നത്.
ഊട്ടറ വേലയ്ക്കിടെ പൊലീസുകാർ മർദിച്ചതിലുള്ള വൈരാഗ്യമാണ് സംഭവത്തിന് പിന്നിലെന്നാണ് പ്രതി പൊലീസിനോട് പറഞ്ഞത്. ബാറിലിരുന്ന് മദ്യപിച്ചശേഷം സ്റ്റേഷന് പുറത്തെത്തിയ ഇയാൾ അകത്തേക്ക് ബിയർ കുപ്പി എറിയുകയായിരുന്നു.
സംഭവത്തിന് പിന്നാലെ രക്ഷപ്പെടാൻ സഹായിച്ച രണ്ട് സുഹൃത്തുക്കളെയും പൊലീസ് കസ്റ്റഡിയിലെടുത്തു. സംഭവത്തിൽ പൊലീസ് തുടർനടപടികൾ സ്വീകരിച്ചുവരികയാണ്.
