കോഴിക്കോട്: ചാലിയാർ പുഴയിൽ മീൻപിടിക്കുന്നതിനിടെ തോണി മറിഞ്ഞ് യുവാവിനെ കാണാതായി. മാവൂർ കുതിരാടം സ്വദേശി ബാസിൽ (23) ആണ് കാണാതായത്. അപകടത്തിൽപ്പെട്ട കൂടെയുണ്ടായിരുന്ന മറ്റ് രണ്ടുപേർ നീന്തി രക്ഷപ്പെട്ടു. ബുധനാഴ്ച പുലർച്ചെ ചാലിയാറിലെ മണന്തല കടവിന് സമീപമായിരുന്നു അപകടം. മൂവരും ചേർന്ന് പുഴയിൽ മീൻപിടിക്കുന്നതിനിടെ ഇവർ സഞ്ചരിച്ചിരുന്ന ചെറിയ തോണി പെട്ടെന്ന് മറിയുകയായിരുന്നുവെന്നാണ് പ്രാഥമിക വിവരം. രക്ഷപ്പെട്ടവർ വിവരമറിയിച്ചതിനെ തുടർന്ന് നാട്ടുകാരും പൊലീസും സ്ഥലത്തെത്തി. അഗ്നിരക്ഷാസേനയുടെ നേതൃത്വത്തിൽ നാട്ടുകാരുടെ സഹകരണത്തോടെ പ്രദേശത്ത് തിരച്ചിൽ തുടരുകയാണ്. പുലർച്ചെയായതിനാൽ വെളിച്ചക്കുറവ് ആദ്യഘട്ടത്തിൽ തിരച്ചിലിന് തടസ്സമായി. കാണാതായ ബാസിലിനായുള്ള തിരച്ചിൽ ഊർജിതമാക്കിയിട്ടുണ്ട്.
