തിരുവനന്തപുരം: തലസ്ഥാനത്തെ വിവിധ ഫിനാൻസ് സ്ഥാപനങ്ങളിൽ മുക്കുപണ്ടം പണയംവെച്ച് പണം തട്ടിയെന്ന പരാതിയിൽ രണ്ട് പേർ അറസ്റ്റിൽ. പൂന്തുറ സ്വദേശികളായ നാസർ, 45, ഷർജാദ്, 25, എന്നിവരെയാണ് വെള്ളറടയിൽനിന്ന് പൊലീസ് പിടികൂടിയത്.
നെയ്യാർ ഡാം പൊലീസ് സ്റ്റേഷൻ പരിധിയിലെ പരുത്തിപ്പള്ളിയിലും അമ്പൂരിക്ക് സമീപമുള്ള ഫിനാൻസ് സ്ഥാപനങ്ങളിലുമാണ് ഇരുവരും സമാന രീതിയിൽ തട്ടിപ്പ് നടത്തിയതെന്നാണ് പൊലീസിന്റെ കണ്ടെത്തൽ.
സെപ്റ്റംബർ 25ന് പരുത്തിപ്പള്ളിയിലെ സ്ഥാപനത്തിൽ 10 ഗ്രാം തൂക്കമുള്ള വള പണയംവെച്ച് 90,000 രൂപ കൈപ്പറ്റിയെന്നാണ് പരാതി. ആധാർ കാർഡ് പിന്നീട് എത്തിച്ച് നൽകാമെന്ന് പറഞ്ഞായിരുന്നു പണം വാങ്ങിയത്.
തുടർന്ന് ഒക്ടോബർ ഒന്നിന് അമ്പൂരിക്ക് സമീപമുള്ള മറ്റൊരു സ്ഥാപനത്തിലും 10 ഗ്രാം തൂക്കമുള്ള വള പണയംവെച്ച് ഒരു ലക്ഷം രൂപ കൈപ്പറ്റിയതായാണ് വിവരം.
സംശയം തോന്നിയതിനെ തുടർന്ന് ഫിനാൻസ് സ്ഥാപന ഉടമ സി.സി.ടി.വി ദൃശ്യങ്ങൾ പരിശോധിച്ച് ഇരുവരെയും തിരിച്ചറിഞ്ഞു. തുടർന്ന് വിവരങ്ങൾ വാട്സ്ആപ്പ് ഗ്രൂപ്പുകളിലൂടെ കൈമാറി.
വെള്ളറടയിൽ സമാനമായ തട്ടിപ്പ് നടത്താൻ ശ്രമിക്കുന്നതിനിടെയാണ് ഇരുവരും പിടിയിലായത്. സംഭവത്തിൽ പൊലീസ് തുടർനടപടികൾ സ്വീകരിച്ചുവരികയാണ്.
