രാഷ്ട്രപിതാവ് മഹാത്മാഗാന്ധിയുടെ 157-ാം ജന്മവാർഷികദിനമാണ് ഇന്ന്. സത്യവും അഹിംസയും ആയുധമാക്കി ബ്രിട്ടീഷ് സാമ്രാജ്യത്വത്തിനെതിരെ പോരാടിയ ഗാന്ധിജിയുടെ ഓർമകൾക്ക് മുന്നിൽ രാജ്യം ആദരമർപ്പിക്കുന്നു. ഗാന്ധിജയന്തി ദിനം ഐക്യരാഷ്ട്രസഭയുടെ നേതൃത്വത്തിൽ അന്താരാഷ്ട്ര അഹിംസാ ദിനമായും ആചരിക്കുന്നു.
‘എന്റെ ജീവിതമാണ് എന്റെ സന്ദേശം’ എന്ന് പറയാനുള്ള ധീരതയായിരുന്നു മോഹൻദാസ് കരംചന്ദ് ഗാന്ധിയെ മഹാത്മാവാക്കി മാറ്റിയത്. സത്യഗ്രഹത്തെ സമരമാർഗമാക്കിയ ഗാന്ധിജിയുടെ പോരാട്ടങ്ങൾ അഹിംസയിൽ അധിഷ്ഠിതമായിരുന്നു. അദ്ദേഹത്തിന്റെ ജീവിതം തന്നെ സത്യാന്വേഷണത്തിന്റെയും പരീക്ഷണങ്ങളുടെയും യാത്രയായിരുന്നു.
സത്യം, അഹിംസ, സമത്വം, സമാധാനം, ഐക്യം, സാഹോദര്യം എന്നിവയുടെ സന്ദേശം ജീവിതത്തിലൂടെ പകർന്നുനൽകാൻ ഗാന്ധിജി നിരന്തരം ശ്രമിച്ചു. വൈരുദ്ധ്യങ്ങളോട് സംവദിച്ച അദ്ദേഹം ഒരേസമയം വിശ്വാസിയും യുക്തിചിന്തകനും മതനിരപേക്ഷ ചിന്തകനുമായി നിലകൊണ്ടു. പാരമ്പര്യത്തിൽ വേരുറപ്പിച്ചുനിന്നപ്പോഴും ആധുനിക മൂല്യങ്ങളെ ഉൾക്കൊള്ളാനും അദ്ദേഹം തയ്യാറായി.
ലണ്ടനിലെ നിയമപഠനത്തിന് ശേഷം ദക്ഷിണാഫ്രിക്കയിൽ അഭിഭാഷകനായി പ്രവർത്തിച്ച ഗാന്ധിജി അവിടെ നേരിട്ട വംശീയ വിവേചനമാണ് അദ്ദേഹത്തിന്റെ രാഷ്ട്രീയ ജീവിതത്തിൽ നിർണായക വഴിത്തിരിവായത്. വംശീയ അനീതിക്കെതിരെ അദ്ദേഹം ശക്തമായ പോരാട്ടം ആരംഭിച്ചു.
1915-ൽ ഇന്ത്യയിലേക്ക് മടങ്ങിയെത്തിയ ശേഷം ബ്രിട്ടീഷ് ഭരണത്തിനെതിരായ സ്വാതന്ത്ര്യസമരത്തിന് ഗാന്ധിജി പുതിയ ദിശ നൽകി. ചമ്പാരൻ സത്യഗ്രഹം, നിസ്സഹകരണ പ്രസ്ഥാനം, ഉപ്പുസത്യഗ്രഹം, ക്വിറ്റ് ഇന്ത്യാ സമരം തുടങ്ങിയ പ്രക്ഷോഭങ്ങൾ ഇന്ത്യൻ സ്വാതന്ത്ര്യസമരത്തിന്റെ ചരിത്രത്തിലെ നിർണായക അധ്യായങ്ങളായി.
അഹിംസയിലൂന്നിയ ജനകീയ സമരത്തിലൂടെ ശക്തമായ സാമ്രാജ്യത്വ ഭരണകൂടത്തെ നേരിടാനാകുമെന്ന് ഗാന്ധിജി ലോകത്തിന് മുന്നിൽ തെളിയിച്ചു. രാഷ്ട്രീയ സ്വാതന്ത്ര്യത്തിനൊപ്പം സാമൂഹിക അനീതികൾക്കും അനാചാരങ്ങൾക്കുമെതിരെയും അദ്ദേഹം നിലകൊണ്ടു.
ഇന്ത്യയുടെ വിഭജനത്തിന്റെ കാലത്ത് വർഗീയ സംഘർഷങ്ങളിൽ മുറിവേറ്റ ജനതയ്ക്കിടയിലൂടെ ശാന്തിയുടെ സന്ദേശവുമായി ഗാന്ധിജി സഞ്ചരിച്ചു. സമാധാനത്തിനും സാഹോദര്യത്തിനും വേണ്ടി നടത്തിയ അദ്ദേഹത്തിന്റെ ഇടപെടലുകൾ അവസാന നാളുകളിലും തുടർന്നു. ഗാന്ധിയൻ ആശയങ്ങൾ ഇന്ത്യയുടെ അതിർത്തികൾക്കപ്പുറവും വലിയ സ്വാധീനം ചെലുത്തി. അമേരിക്കയിലെ പൗരാവകാശ പ്രസ്ഥാനത്തിന്റെ നേതാവ് മാർട്ടിൻ ലൂഥർ കിംഗ് ജൂനിയർ, ദക്ഷിണാഫ്രിക്കൻ നേതാവ് നെൽസൺ മണ്ടേല തുടങ്ങിയവരെയും ഗാന്ധിജിയുടെ ചിന്തകൾ സ്വാധീനിച്ചു.
ലോകത്തിന്റെ വിവിധ ഭാഗങ്ങളിൽ സംഘർഷങ്ങളും അക്രമങ്ങളും തുടരുന്ന കാലത്ത് സത്യത്തിന്റെയും അഹിംസയുടെയും സഹവർത്തിത്വത്തിന്റെയും സന്ദേശവുമായി മറ്റൊരു ഗാന്ധിജയന്തി കൂടി കടന്നുപോകുന്നു. കാലം മാറിയാലും ഗാന്ധിജിയുടെ ആശയങ്ങളെക്കുറിച്ചുള്ള ചർച്ചകൾക്ക് ഇന്നും പ്രസക്തിയുണ്ടെന്ന ഓർമപ്പെടുത്തലാണ് ഈ ദിനം.
