ശബരിമല മാസ്റ്റർപ്ലാനുമായി ബന്ധപ്പെട്ട് എൽഡിഎഫ് സർക്കാരിനെതിരെ പുതിയ ചോദ്യങ്ങൾ ഉയരുന്നു. മാസ്റ്റർപ്ലാനിനായി പ്രഖ്യാപിച്ച മുഴുവൻ തുകയും അനുവദിച്ചില്ലെന്ന് ശബരിമല ഹൈപവർ കമ്മിറ്റി രേഖകൾ വ്യക്തമാക്കുന്നു. വിവരാവകാശ നിയമപ്രകാരം ലഭിച്ച രേഖകളാണ് ഇക്കാര്യം വെളിപ്പെടുത്തുന്നത്.
ശബരിമലയിൽ റോഡുകൾ ഉൾപ്പെടെ അടിസ്ഥാന സൗകര്യങ്ങൾ വികസിപ്പിക്കുന്നതിനായി 2016–17 വർഷങ്ങളിൽ 275 കോടി രൂപയുടെ മാസ്റ്റർപ്ലാനാണ് പ്രഖ്യാപിച്ചിരുന്നത്. എന്നാൽ പ്രഖ്യാപിച്ച തുകയിൽ നിന്ന് 85.45 കോടി രൂപ മാത്രമാണ് പദ്ധതിക്കായി ലഭിച്ചതെന്നാണ് ശബരിമല ഹൈപവർ കമ്മിറ്റി രേഖകൾ വ്യക്തമാക്കുന്നത്.
ലഭിച്ച 85.45 കോടിയിൽ 85.39 കോടി രൂപ ചെലവഴിച്ചതായും രേഖകളിലുണ്ട്. എന്നാൽ വകയിരുത്തിയ 275 കോടി രൂപയുടെ ബാക്കി തുക പദ്ധതിക്കായി ലഭിച്ചില്ലെന്നാണ് രേഖകൾ സൂചിപ്പിക്കുന്നത്.
അയ്യപ്പ സംഗമം ഉൾപ്പെടെ വിവിധ വേദികളിൽ മാസ്റ്റർപ്ലാൻ ചർച്ചയായിരുന്നെങ്കിലും, പ്രഖ്യാപിച്ച പദ്ധതി പൂർണമായി നടപ്പാക്കാൻ ആവശ്യമായ ധനസഹായം ലഭിച്ചില്ലെന്ന വിമർശനത്തിനാണ് ഈ രേഖകൾ ശക്തിപകരുന്നത്.
വിവരാവകാശ പ്രവർത്തകൻ കെ. ഗോവിന്ദൻ നമ്പൂതിരിക്ക് ലഭിച്ച ശബരിമല ഹൈപവർ കമ്മിറ്റി രേഖകളിലാണ് ഈ വിവരങ്ങൾ ഉൾപ്പെട്ടിരിക്കുന്നത്.
