കൊച്ചിയിൽ ലുലു ഗ്രൂപ്പിനെ വ്യാജ ഇ-മെയിൽ വഴി കബളിപ്പിച്ച് 1.64 കോടി രൂപ തട്ടിയെടുത്തതായി പരാതി. ഇറ്റാലിയൻ കമ്പനിയുടെ പേരിൽ ആൾമാറാട്ടം നടത്തിയാണ് തട്ടിപ്പ്. സംഭവത്തിൽ കൊച്ചി സൈബർ പൊലീസ് കേസെടുത്ത് അന്വേഷണം ആരംഭിച്ചു.
ലുലു ഗ്രൂപ്പുമായി ദീർഘകാലമായി വ്യാപാരബന്ധമുള്ള ഇറ്റലിയിലെ ‘ഐ.ഇ. പാർക്ക് എസ്.ആർ.എൽ.’ എന്ന കമ്പനിയുടെ ഔദ്യോഗിക ഇ-മെയിൽ വിലാസങ്ങളോട് സാമ്യമുള്ള വിലാസങ്ങൾ സൃഷ്ടിച്ചാണ് തട്ടിപ്പ് നടത്തിയത്. സെപ്റ്റംബർ രണ്ട് മുതൽ 29 വരെയുള്ള കാലയളവിലായിരുന്നു സംഭവം.
ഇറ്റാലിയൻ കമ്പനിയിൽനിന്ന് വാങ്ങിയ ഗെയിമിങ് ഉപകരണങ്ങളുടെ വിലയായി നൽകാനുണ്ടായിരുന്ന തുകയാണ് തട്ടിപ്പുകാർ കൈക്കലാക്കിയത്. പണം കൈമാറുന്നതുമായി ബന്ധപ്പെട്ട് കഴിഞ്ഞ മാസം ലുലു ഗ്രൂപ്പിന് ഇ-മെയിൽ സന്ദേശം ലഭിച്ചിരുന്നു. യഥാർഥ കമ്പനിയുടേതിന് സമാനമായ ഇ-മെയിൽ വിലാസത്തിൽനിന്ന് ലഭിച്ച സന്ദേശത്തിൽ ഇൻവോയിസും ബാങ്ക് അക്കൗണ്ട് വിവരങ്ങളും ഉൾപ്പെടുത്തിയിരുന്നു.
തുടർന്ന് 1,50,500 യൂറോ തട്ടിപ്പുകാർ നൽകിയ അക്കൗണ്ടിലേക്ക് കൈമാറി. എന്നാൽ, യഥാർഥ കമ്പനിയുമായി ബന്ധപ്പെട്ടപ്പോഴാണ് പണം ലഭിച്ചിട്ടില്ലെന്ന് വ്യക്തമായത്. ഇതോടെയാണ് തട്ടിപ്പ് തിരിച്ചറിഞ്ഞത്.
ലുലു ഗ്രൂപ്പും ഇറ്റാലിയൻ കമ്പനിയും തമ്മിലുള്ള ഇടപാടുകളെക്കുറിച്ച് വ്യക്തമായ അറിവുള്ള സംഘമാണ് തട്ടിപ്പിന് പിന്നിലെന്നാണ് പൊലീസിന്റെ പ്രാഥമിക നിഗമനം. വിദേശത്തുള്ള സംഘത്തിന് സംഭവത്തിൽ പങ്കുണ്ടെന്നാണ് സൂചന. സൈബർ പൊലീസ് അന്വേഷണം തുടരുകയാണ്.
