കാരക്കാസ്: വെനസ്വേലയെ നടുക്കി ശക്തമായ ഇരട്ട ഭൂചലനങ്ങൾ. റിക്ടർ സ്കെയിലിൽ 7.2ഉം 7.5ഉം തീവ്രത രേഖപ്പെടുത്തിയ ഭൂചലനങ്ങൾ തലസ്ഥാനമായ കാരക്കാസിലും സമീപ പ്രദേശങ്ങളിലും വൻ നാശനഷ്ടമുണ്ടാക്കി. നിരവധി കെട്ടിടങ്ങൾ തകർന്നുവീണതായും രക്ഷാപ്രവർത്തനം പുരോഗമിക്കുകയാണെന്നും അധികൃതർ അറിയിച്ചു.
പ്രാദേശിക സമയം വൈകിട്ട് ആറുമണിയോടെയായിരുന്നു ആദ്യ ഭൂചലനം അനുഭവപ്പെട്ടത്. മൊറോൺ പ്രദേശത്തിന് സമീപമായിരുന്നു ആദ്യ ഭൂചലനത്തിന്റെ പ്രഭവകേന്ദ്രം. ഏതാനും സെക്കൻഡുകൾക്കുശേഷം 7.5 തീവ്രത രേഖപ്പെടുത്തിയ രണ്ടാമത്തെ ശക്തമായ ഭൂചലനവും ഉണ്ടായി. രണ്ട് ഭൂചലനങ്ങളുടെയും പ്രഭവകേന്ദ്രങ്ങൾ കാരക്കാസിൽ നിന്ന് ഏകദേശം 160 കിലോമീറ്റർ അകലെയായിരുന്നു.
ഭൂചലനത്തെ തുടർന്ന് കാരക്കാസിലെ നിരവധി കെട്ടിടങ്ങൾക്ക് ഗുരുതരമായ കേടുപാടുകൾ സംഭവിച്ചു. ചില കെട്ടിടങ്ങൾ പൂർണമായും തകർന്നുവീണതായും നിരവധി പ്രദേശങ്ങളിൽ വൈദ്യുതി, ആശയവിനിമയ സംവിധാനങ്ങൾ തടസപ്പെട്ടതായും റിപ്പോർട്ടുകളുണ്ട്. ഭൂചലനത്തിന്റെ പ്രകമ്പനം അയൽരാജ്യമായ കൊളംബിയയിലും അനുഭവപ്പെട്ടു.
സ്ഥിതിഗതികൾ വിലയിരുത്തുന്നതിനായി വെനസ്വേലയിൽ അടിയന്തരാവസ്ഥ പ്രഖ്യാപിച്ചിട്ടുണ്ട്. ജനങ്ങൾ ജാഗ്രത പാലിക്കണമെന്നും കേടുപാടുകൾ സംഭവിച്ച കെട്ടിടങ്ങളിൽ പ്രവേശിക്കരുതെന്നും അധികൃതർ നിർദേശിച്ചു. രക്ഷാപ്രവർത്തനങ്ങൾ തുടരുകയാണെന്നും കൂടുതൽ നാശനഷ്ടങ്ങളുടെ കണക്ക് ലഭ്യമാകാനുണ്ടെന്നും സർക്കാർ അറിയിച്ചു.
അതേസമയം, ഭൂചലനത്തെ തുടർന്ന് കരീബിയൻ മേഖലയിലെ ചില തീരപ്രദേശങ്ങൾക്ക് സുനാമി മുന്നറിയിപ്പ് നൽകിയിരുന്നു. എന്നാൽ ചില പ്രദേശങ്ങളിലെ മുന്നറിയിപ്പുകൾ പിന്നീട് പിൻവലിച്ചതായും റിപ്പോർട്ടുകളുണ്ട്.
