ഡൽഹി: ഓൺലൈൻ ടാക്സി യാത്രക്കാർക്ക് ആശ്വാസമായി കേന്ദ്ര ഗതാഗത മന്ത്രാലയത്തിന്റെ നിർദേശം. യാത്ര ആരംഭിക്കുന്നതിന് മുൻപ് യാത്രക്കാരോട് ടിപ്പ് ആവശ്യപ്പെടുന്ന രീതി പൂർണമായും ഒഴിവാക്കണമെന്ന് ഓൺലൈൻ ടാക്സി ആപ്പുകൾക്ക് കേന്ദ്രം നിർദേശം നൽകി.
ഊബർ, റാപ്പിഡോ ഉൾപ്പെടെയുള്ള ക്യാബ് അഗ്രിഗേറ്റർമാർക്കാണ് നിർദേശം. റൈഡ് ബുക്ക് ചെയ്യുന്ന സമയത്തോ യാത്ര ആരംഭിക്കുന്നതിന് മുമ്പോ ആപ്പിൽ ടിപ്പ് ഓപ്ഷൻ കാണിക്കാൻ പാടില്ല.
ടിപ്പ് നൽകിയാൽ വാഹനം വേഗത്തിൽ ലഭിക്കുമെന്ന തരത്തിലുള്ള സാഹചര്യം സൃഷ്ടിക്കുന്നത് ശരിയല്ലെന്നും കേന്ദ്രം വ്യക്തമാക്കി. ടിപ്പ് നൽകുന്നത് റൈഡ് സ്വീകരിക്കാനുള്ള സാധ്യതയെയോ യാത്രക്കാരുടെ കാത്തിരിപ്പ് സമയത്തെയോ സേവനത്തിന്റെ ഗുണനിലവാരത്തെയോ സ്വാധീനിക്കാൻ പാടില്ലെന്നും മന്ത്രാലയം നിർദേശിച്ചു.
അതേസമയം, യാത്ര പൂർത്തിയായതിന് ശേഷം യാത്രക്കാരുടെ താൽപര്യപ്രകാരം സ്വമേധയാ ടിപ്പ് നൽകുന്നതിന് തടസ്സമില്ല.
ആപ്പുകളിൽ ടിപ്പ് ആവശ്യപ്പെടുന്ന പ്രോംപ്റ്റുകൾ ഉടൻ നീക്കം ചെയ്യണമെന്നും അഡ്വാൻസ് ടിപ്പ് ഓപ്ഷൻ അടിയന്തരമായി ഒഴിവാക്കണമെന്നും കേന്ദ്ര ഗതാഗത മന്ത്രാലയം ക്യാബ് അഗ്രിഗേറ്റർമാരോട് നിർദേശിച്ചിട്ടുണ്ട്.
