അമ്പലപ്പുഴ: കച്ചേരി മുക്കിന് കിഴക്കുഭാഗത്ത് പ്രവർത്തിക്കുന്ന ബ്യൂട്ടി ആർട്സ് സ്ഥാപനത്തിൽ എ.സി പൊട്ടിത്തെറിച്ച് തീപിടിത്തം. അപകടത്തിൽ ബ്യൂട്ടി പാർലറും സമീപത്തെ കടമുറിയിലെ സാധനങ്ങളും പൂർണമായും കത്തിനശിച്ചു. ഏകദേശം മൂന്ന് ലക്ഷം രൂപയുടെ നഷ്ടം കണക്കാക്കുന്നു. സംഭവത്തിൽ ആർക്കും പരിക്കില്ല.
കഞ്ഞിപ്പാടം മുപ്പത്തിയഞ്ചിൽ ആശയുടെ ഉടമസ്ഥതയിലുള്ള സ്ഥാപനത്തിലാണ് ഇന്ന് രാവിലെ പത്തരയോടെ തീപിടിത്തമുണ്ടായത്. സ്ഥാപനം തുറന്ന ശേഷം ആശ എ.സി ഓൺ ചെയ്ത ഉടൻ പൊട്ടിത്തെറിച്ച് തീ പടരുകയായിരുന്നു. തീ പടർന്നതോടെ ആശ പുറത്തേക്ക് ഓടിയതിനാൽ വലിയ ദുരന്തം ഒഴിവായി.
ബ്യൂട്ടി പാർലറിന് പുറമെ തൊട്ടടുത്ത കടമുറിയിലെ സാധനങ്ങളും പൂർണമായും കത്തിനശിച്ചു. സമീപത്തെ മറ്റൊരു ഗോഡൗണിലേക്കും തീ പടർന്നിരുന്നു.
വിവരമറിഞ്ഞ് തകഴിയിൽ നിന്ന് രണ്ട് യൂണിറ്റ് ഫയർഫോഴ്സ് സ്ഥലത്തെത്തി. അരമണിക്കൂറിലധികം നീണ്ട പരിശ്രമത്തിനൊടുവിലാണ് തീ പൂർണമായും അണച്ചത്.
കെട്ടിടത്തിന്റെ മുകൾഭാഗത്തായിരുന്നു തീപിടിത്തം ഉണ്ടായത്. കഴിഞ്ഞ നാല് വർഷമായി ഇവിടെ ബ്യൂട്ടി പാർലർ പ്രവർത്തിച്ചുവരികയായിരുന്നു. തീപിടിത്തത്തിന്റെ കാരണം സംബന്ധിച്ച് കൂടുതൽ പരിശോധനകൾ ആവശ്യമാണ്.
