കൊല്ലം: പ്രായപൂർത്തിയാകാത്ത മകന് സ്കൂട്ടർ ഓടിക്കാൻ നൽകിയ അമ്മയ്ക്ക് 26,000 രൂപ പിഴ വിധിച്ച് കോടതി. 14 വയസുകാരന് വാഹനം കൈമാറിയ കേസിലാണ് കടയ്ക്കൽ ഒന്നാം ക്ലാസ് മജിസ്ട്രേറ്റ് കോടതി നടപടി സ്വീകരിച്ചത്.
വാഹനം അമ്മയുടെ പേരിൽ രജിസ്റ്റർ ചെയ്തിരുന്നതിനാലാണ് രക്ഷിതാവിനെതിരെ കേസ് രജിസ്റ്റർ ചെയ്ത് പിഴ ശിക്ഷ വിധിച്ചത്.
2023 ഏപ്രിൽ 9-ന് ചിതറ പൊലീസ് മടത്തറ കൊല്ലായി ജങ്ഷനിൽ നടത്തിയ വാഹനപരിശോധനയ്ക്കിടെയാണ് 14 വയസുകാരൻ സ്കൂട്ടർ ഓടിക്കുന്നതിനിടെ പിടിയിലായത്. തുടർന്ന് കുട്ടിയുടെ രക്ഷിതാവിനെ സ്റ്റേഷനിലേക്ക് വിളിച്ചുവരുത്തി പൊലീസ് കേസെടുത്തു.
പ്രായപൂർത്തിയാകാത്തവർക്ക് വാഹനം ഓടിക്കാൻ അനുവദിക്കുന്നവർക്കെതിരെ കർശന നിയമനടപടി തുടരുമെന്ന് പൊലീസ് അറിയിച്ചു.
