വാട്‌സ്ആപ്പ് ബിസിനസ് പ്ലാറ്റ്‌ഫോം ഉപയോഗിക്കുന്ന കമ്പനികൾക്ക് ഇന്ന് മുതൽ ചില സന്ദേശങ്ങൾക്ക് നിരക്ക് ഈടാക്കും.
ഇന്ത്യയിൽ ഒക്ടോബർ ഒന്ന് മുതൽ സർവീസ്, യൂട്ടിലിറ്റി വിഭാഗത്തിലുള്ള സന്ദേശങ്ങൾക്ക് പുതിയ നിരക്ക് ബാധകമാകുമെന്നാണ് മെറ്റ അറിയിച്ചിരിക്കുന്നത്. ഓർഡർ അപ്‌ഡേറ്റുകൾ, ഡെലിവറി വിവരങ്ങൾ, ബുക്കിങ്, പേയ്‌മെന്റ് സംബന്ധമായ അറിയിപ്പുകൾ തുടങ്ങിയവ അയയ്ക്കുന്ന കമ്പനികളെയാണ് പ്രധാനമായും ഇത് ബാധിക്കുക.
പ്രതിമാസം 1,000 സൗജന്യ സർവീസ് മെസേജുകൾക്ക് ശേഷമുള്ള അധിക സന്ദേശങ്ങൾക്ക് നിരക്ക് ഈടാക്കും. 1,000 സന്ദേശങ്ങൾക്ക് 115 രൂപയും 10,000 സന്ദേശങ്ങൾക്ക് 1,150 രൂപയുമാണ് ജിഎസ്ടിക്ക് മുമ്പുള്ള നിരക്ക്.
അതേസമയം, സാധാരണ ചെറുകിട വ്യാപാരികൾ ഉപയോഗിക്കുന്ന വാട്‌സ്ആപ്പ് ബിസിനസ് ആപ്പിന് ഈ നിരക്ക് ബാധകമല്ല. വലിയ തോതിൽ ഉപഭോക്താക്കളുമായി ആശയവിനിമയം നടത്തുന്ന ബാങ്കുകൾ, റീട്ടെയിൽ സ്ഥാപനങ്ങൾ, ട്രാവൽ കമ്പനികൾ, ഇ-കൊമേഴ്‌സ് സ്ഥാപനങ്ങൾ തുടങ്ങിയവയാണ് വാട്‌സ്ആപ്പ് ബിസിനസ് പ്ലാറ്റ്‌ഫോം പ്രധാനമായും ഉപയോഗിക്കുന്നത്.
ഉപഭോക്താക്കൾക്ക് സാധാരണ വാട്‌സ്ആപ്പ് ഉപയോഗിക്കുന്നതിന് ഈ മാറ്റം നേരിട്ട് ബാധകമല്ല.
