കോഴിക്കോട്: വൻ ജനപങ്കാളിത്തം കൊണ്ട് ശ്രദ്ധേയമായ കോഴിക്കോട് കാരന്തൂരിലെ ഹരഹര മഹാദേവ ക്ഷേത്രത്തിൽ വീണ്ടും വിവാഹ രജിസ്ട്രേഷൻ ക്യാമ്പ്. വിവാഹ രജിസ്ട്രേഷനായി നൂറുകണക്കിന് ആളുകളാണ് ഇന്ന് ക്ഷേത്രത്തിലെത്തിയത്. കഴിഞ്ഞ മാസം സംഘടിപ്പിച്ച ക്യാമ്പിൽ പ്രതീക്ഷിച്ചതിനേക്കാൾ വലിയ ജനപങ്കാളിത്തമുണ്ടായതിനെത്തുടർന്നാണ് വീണ്ടും ക്യാമ്പ് സംഘടിപ്പിക്കുന്നത്.
ആയിരത്തോളം പേരെ പ്രതീക്ഷിച്ച് നടത്തിയ കഴിഞ്ഞ മാസത്തെ ക്യാമ്പിൽ ഏകദേശം 7000 പേരാണ് പങ്കെടുത്തത്. കേരളത്തിന്റെ വിവിധ ജില്ലകളിൽ നിന്നുള്ളവരും വിവാഹ രജിസ്ട്രേഷനായി എത്തിയിരുന്നു. ക്ഷേത്രം നടത്തുന്ന സന്നദ്ധ പ്രവർത്തനങ്ങളുടെ ഭാഗമായാണ് അവിവാഹിതർക്കായി ക്യാമ്പ് സംഘടിപ്പിച്ചത്.
ആദ്യഘട്ടത്തിൽ ക്ഷേത്രപരിസരത്തെ അവിവാഹിതരെ ലക്ഷ്യമിട്ടായിരുന്നു ക്യാമ്പ് ആസൂത്രണം ചെയ്തത്. എന്നാൽ വാട്സാപ്പ്, ഫേസ്ബുക്ക് ഗ്രൂപ്പുകളിലൂടെ അറിയിപ്പ് വ്യാപകമായി പ്രചരിച്ചതോടെ ജില്ലകൾ കടന്നും ആളുകളെത്തി.
രാവിലെ ഒൻപത് മണിക്ക് തുടങ്ങാനിരുന്ന ക്യാമ്പിൽ ഉദ്ഘാടകൻ എത്തുന്നതിന് മുമ്പുതന്നെ വലിയ തിരക്കാണ് അനുഭവപ്പെട്ടത്. ജനത്തിരക്ക് നിയന്ത്രിക്കാൻ സംഘാടകർ നേരത്തെ തന്നെ അപേക്ഷാ ഫോമുകൾ വിതരണം ചെയ്യേണ്ടിവന്നു. രജിസ്ട്രേഷനായി എത്തിയവരുടെ ക്യൂ ക്ഷേത്രവളപ്പും കടന്ന് ദേശീയപാതയിലേക്ക് നീണ്ടതോടെ പൊലീസ് ഇടപെട്ടാണ് തിരക്ക് നിയന്ത്രിച്ചത്. അച്ചടിച്ച അപേക്ഷാ ഫോമുകൾ തീർന്നതോടെ പ്രസ് തുറപ്പിച്ച് ഫോട്ടോകോപ്പികൾ എടുത്തും വിതരണം ചെയ്തു.
ആയിരത്തോളം അപേക്ഷകരെ പ്രതീക്ഷിച്ച ക്യാമ്പിൽ പതിനായിരത്തോളം അപേക്ഷകളാണ് ലഭിച്ചത്. അപേക്ഷകരിൽ 80 ശതമാനവും 30 വയസ്സിന് മുകളിൽ പ്രായമുള്ള പുരുഷന്മാരായിരുന്നു.
പുരുഷന്മാരുടെ പങ്കാളിത്തം കൂടുതലായതിനാൽ നവംബർ 21ന് ശേഷമുള്ള എല്ലാ ഞായറാഴ്ചകളിലും ക്ഷേത്രത്തിൽ വിവാഹ രജിസ്ട്രേഷൻ ക്യാമ്പ് നടത്താനാണ് ഭാരവാഹികളുടെ തീരുമാനം. കൂടുതൽ അവിവാഹിതർക്ക് അവസരം ലഭ്യമാക്കുകയാണ് ലക്ഷ്യം.




