ചെന്നൈ: തമിഴ്നാട്ടിൽ പ്രീ കെ.ജി വിദ്യാർത്ഥിയായ മൂന്ന് വയസ്സുകാരന്റെ കൈകൾ ഷീറ്റിൽ പൊതിഞ്ഞ് കൂട്ടിക്കെട്ടിയതായി പരാതി. തിരുവാരൂർ ജില്ലയിലെ തിരുത്തുറൈപ്പൂണ്ടിയിലെ സ്വകാര്യ സ്കൂളിലാണ് സംഭവം. കുട്ടിയുടെ കൈകൾ കെട്ടിയിട്ട നിലയിലുള്ളതും രക്ഷപ്പെടാൻ ശ്രമിക്കുന്നതും കണ്ണിന് സമീപം പരിക്കേറ്റ് രക്തം വരുന്നതുമായ സി.സി.ടി.വി ദൃശ്യങ്ങൾ പുറത്തുവന്നു.
സംഭവത്തിൽ അധ്യാപികയ്ക്കും വനിതാ അറ്റൻഡർക്കുമെതിരെ പൊലീസ് കേസെടുത്തു. കുട്ടിയോട് ക്രൂരത കാട്ടിയതിനും ഉത്തരവാദിത്തമില്ലാതെ പെരുമാറിയതിനുമാണ് നടപടി.
കുട്ടി വികൃതി കാണിക്കുകയും അധ്യാപികയുടെ നിർദേശങ്ങൾ അനുസരിക്കാതിരിക്കുകയും ചെയ്തതിനാലാണ് വനിതാ അറ്റൻഡർ വിനൈൽ ഷീറ്റിൽ പൊതിഞ്ഞ് കൈകൾ കെട്ടിയതെന്നാണ് പൊലീസിന്റെ വിശദീകരണം. ഇതിനിടെ കുട്ടി താഴെ വീണതാകാം കണ്ണിന് സമീപം പരിക്കേൽക്കാൻ കാരണമെന്നും കരുതുന്നു.
കൈകൾ കെട്ടിയ നിലയിൽ എഴുന്നേൽക്കാനും കയർ കടിച്ചുപൊട്ടിച്ച് രക്ഷപ്പെടാനും കുട്ടി ശ്രമിക്കുന്ന ദൃശ്യങ്ങളും പുറത്തുവന്നിട്ടുണ്ട്. മറ്റൊരു ദൃശ്യത്തിൽ കുട്ടി കരയുന്നതും കാണാം.
പരിക്കുകളോടെ കുട്ടി വീട്ടിലെത്തിയതോടെയാണ് സംഭവം പുറത്തറിയുന്നത്. അധ്യാപികയും വനിതാ അറ്റൻഡറും മർദിച്ചതായി കുട്ടി പിതാവിനോട് പറഞ്ഞു. തുടർന്ന് സ്കൂളിലെത്തി സി.സി.ടി.വി ദൃശ്യങ്ങൾ പരിശോധിച്ച പിതാവ് ദൃശ്യങ്ങൾ മൊബൈൽ ഫോണിൽ പകർത്തി തിരുത്തുറൈപ്പൂണ്ടി പൊലീസിൽ പരാതി നൽകുകയായിരുന്നു.
സംഭവത്തിന് പിന്നാലെ അധ്യാപികയെയും വനിതാ അറ്റൻഡറെയും സ്കൂൾ മാനേജ്മെന്റ് ജോലിയിൽനിന്ന് പിരിച്ചുവിട്ടതായാണ് റിപ്പോർട്ട്.




