തിരുവനന്തപുരം: പാങ്ങപ്പാറയിലെ പ്ലസ് വൺ വിദ്യാർഥി അഭിറാമിന്റെ കൊലപാതകത്തിൽ ഗൂഢാലോചനയുടെ കൂടുതൽ വിവരങ്ങൾ പുറത്ത്. കൊലപാതകത്തിന് പിന്നാലെ മൃതദേഹം മറ്റൊരിടത്ത് ഉപേക്ഷിക്കാനായിരുന്നു പ്രതികളുടെ പദ്ധതിയെന്നും എന്നാൽ കനത്ത മഴയെ തുടർന്ന് നീക്കം പാളിയെന്നുമാണ് അന്വേഷണ സംഘത്തിന്റെ കണ്ടെത്തൽ.
രണ്ടാം പ്രതി ഉമറിന്റെ സുഹൃത്ത് ഐശ്വര്യയെ ചോദ്യം ചെയ്തതോടെയാണ് മറ്റ് പ്രതികൾ നൽകിയ മൊഴികളിൽ വൈരുധ്യങ്ങളുണ്ടെന്ന് പൊലീസ് കണ്ടെത്തിയത്. മൃതദേഹം മറ്റൊരിടത്തേക്ക് മാറ്റുന്നതിനായി സമീപത്തെ കടയിൽനിന്ന് വലിയ കവർ വാങ്ങിയതായും അന്വേഷണത്തിൽ വിവരം ലഭിച്ചിട്ടുണ്ട്.
കേസിൽ റിമാൻഡിലുള്ള മുഴുവൻ പ്രതികളെയും കസ്റ്റഡിയിൽ വാങ്ങാനാണ് പൊലീസിന്റെ നീക്കം. ഇതിനായി കോടതിയിൽ കസ്റ്റഡി അപേക്ഷ സമർപ്പിക്കും. അന്വേഷണം വഴിതെറ്റിക്കാൻ പ്രതികൾ പരസ്പരവിരുദ്ധമായ മൊഴികൾ നൽകുന്നതായാണ് അന്വേഷണ സംഘത്തിന്റെ വിലയിരുത്തൽ. പ്രതികളെ ഒന്നിച്ചും വെവ്വേറെയും ചോദ്യം ചെയ്ത് സംഭവത്തിലെ കൂടുതൽ വിവരങ്ങൾ പുറത്തുകൊണ്ടുവരാനാണ് ശ്രമം.
പ്രതികളുടെ ഫോൺവിളികളും സാമൂഹികമാധ്യമ ചാറ്റുകളും സൈബർ സെൽ പരിശോധിച്ചുവരികയാണ്. മൊബൈൽ ഫോണുകൾ കണ്ടെത്താനുള്ള പരിശോധനയും പുരോഗമിക്കുന്നു.
രണ്ടാം പ്രതിയായ ഉമറിനെ കൊലപാതകത്തിന് ശേഷം രക്ഷപ്പെടാൻ സഹായിച്ചത് സുഹൃത്തായ ഐശ്വര്യയാണെന്നും പൊലീസ് കണ്ടെത്തിയിട്ടുണ്ട്. കൊലപാതകം നടന്ന സമയത്ത് ഉമർ വീട്ടിൽത്തന്നെയുണ്ടായിരുന്നുവെന്ന് വരുത്തിത്തീർത്ത് അന്വേഷണത്തെ വഴിതെറ്റിക്കാനായിരുന്നു ഇരുവരുടെയും ശ്രമമെന്നാണ് പൊലീസിന്റെ കണ്ടെത്തൽ.
ഇതിനായി ഐശ്വര്യ ഉമറിനെ ഫോണിൽ വിളിക്കുകയും കൃത്യം നടക്കുന്ന സമയം മുഴുവൻ സംഭാഷണം തുടരുകയും ചെയ്തുവെന്നാണ് അന്വേഷണ സംഘത്തിന്റെ കണ്ടെത്തൽ.
ഉമർ കാപ്പാ കേസിൽ ശിക്ഷ അനുഭവിച്ചയാളാണ്. കേസിലെ ഒന്നാം പ്രതിയായ പതിനേഴുകാരൻ മോഷണക്കേസിലും പ്രതിയായിരുന്നുവെന്ന് പൊലീസ് അറിയിച്ചു.
കൊലപാതകത്തിലെ ഗൂഢാലോചനയും തെളിവ് നശിപ്പിക്കാനുള്ള ശ്രമങ്ങളും സംബന്ധിച്ച് കൂടുതൽ വ്യക്തത വരുത്താനുള്ള അന്വേഷണത്തിലാണ് പൊലീസ്.
