തിരുവനന്തപുരം: സെൻട്രൽ റെയിൽവേ സ്റ്റേഷനിൽ എക്സൈസും റെയിൽവേ പൊലീസും സംയുക്തമായി നടത്തിയ പരിശോധനയിൽ 2.8 കിലോഗ്രാം കഞ്ചാവ് കണ്ടെത്തി. പ്ലാറ്റ്ഫോമിലെ കസേരകൾക്കടിയിൽ ബാഗിൽ ഒളിപ്പിച്ച് ഉപേക്ഷിച്ച നിലയിലായിരുന്നു കഞ്ചാവ് കണ്ടെത്തിയത്. സംഭവത്തിൽ കഞ്ചാവ് കൊണ്ടുവന്നവരെ കണ്ടെത്താനുള്ള അന്വേഷണം തുടരുകയാണ്.
ലഹരിക്കടത്ത് തടയുന്നതിനായി നടപ്പാക്കുന്ന ഓപ്പറേഷൻ തണ്ടറിന്റെ ഭാഗമായി റെയിൽവേ സ്റ്റേഷനുകൾ കേന്ദ്രീകരിച്ച് പരിശോധന ശക്തമാക്കിയിട്ടുണ്ട്. വിവിധ റെയിൽവേ സ്റ്റേഷനുകളിൽ എക്സൈസും റെയിൽവേ പൊലീസും സംയുക്തമായി പരിശോധന നടത്തുന്നുണ്ട്.
പരിശോധന കർശനമാക്കിയതോടെ കഞ്ചാവ് കടത്തിക്കൊണ്ടുവരുന്നവർ ലക്ഷ്യസ്ഥാനത്ത് എത്തിക്കാനാകാതെ ട്രെയിനുകളിലും പ്ലാറ്റ്ഫോമുകളിലും ലഹരിവസ്തുക്കൾ ഉപേക്ഷിക്കുന്ന സംഭവങ്ങൾ പതിവാകുന്നതായി അധികൃതർ അറിയിച്ചു.
തിരുവനന്തപുരം എക്സൈസ് സർക്കിൾ ഇൻസ്പെക്ടർ റെജി ലാലിന്റെ നേതൃത്വത്തിലായിരുന്നു പരിശോധന. അസിസ്റ്റന്റ് എക്സൈസ് ഇൻസ്പെക്ടർ ഗ്രേഡ് ആർ. രാജേഷ് കുമാർ, പ്രിവന്റീവ് ഓഫീസർ ഗ്രേഡ് ഉദ്യോഗസ്ഥരായ സുരേഷ് കുമാർ, ബോബിൻ വി. രാജ്, സിവിൽ എക്സൈസ് ഓഫീസർ അനൂപ് എന്നിവരും സംഘത്തിലുണ്ടായിരുന്നു.
റെയിൽവേ പൊലീസിനെ പ്രതിനിധീകരിച്ച് സബ് ഇൻസ്പെക്ടർ അനൂബ് എസ്., അസിസ്റ്റന്റ് സബ് ഇൻസ്പെക്ടർ ജോജി ജോസഫ് എന്നിവരും പരിശോധനയിൽ പങ്കെടുത്തു.
റെയിൽവേ സ്റ്റേഷനുകൾ വഴിയുള്ള ലഹരിക്കടത്ത് തടയുന്നതിനായി പരിശോധനയും നിരീക്ഷണവും ശക്തമായി തുടരുമെന്ന് അധികൃതർ അറിയിച്ചു.
