കുട്ടികളുടെ ഇന്റർനെറ്റ് ഉപയോഗത്തിന് പൂർണ നിരോധനം ഏർപ്പെടുത്തുന്നതിന് പകരം ദോഷകരമായ ഉള്ളടക്കങ്ങൾ നിയന്ത്രിക്കുകയാണ് വേണ്ടതെന്ന് സുപ്രീംകോടതി. ഇന്റർനെറ്റ് ലഭ്യത കുട്ടികൾ ഉൾപ്പെടെയുള്ളവരുടെ മൗലികാവകാശമാണെന്നും പ്രായത്തിന്റെ പേരിൽ മാത്രം ഇന്റർനെറ്റ് നിഷേധിക്കാനാവില്ലെന്നും കോടതി നിരീക്ഷിച്ചതായാണ് റിപ്പോർട്ട്.
2024ലെ കേന്ദ്രസർക്കാർ മാർഗനിർദേശങ്ങൾ ചോദ്യം ചെയ്തുള്ള ഹർജിയിലാണ് ജസ്റ്റിസുമാരായ ജെ.ബി. പർദിവാല, കെ. വിനോദ് ചന്ദ്രൻ എന്നിവരടങ്ങിയ ബെഞ്ചിന്റെ നിരീക്ഷണങ്ങൾ.
ഇന്റർനെറ്റ് ഉപയോഗത്തിന് പൂർണ നിരോധനം ഏർപ്പെടുത്തിയാൽ കുട്ടികൾ കൂടുതൽ സുരക്ഷിതമല്ലാത്ത മറ്റ് പ്ലാറ്റ്ഫോമുകളിലേക്ക് മാറാൻ സാധ്യതയുണ്ടെന്നും ഇത് കൂടുതൽ അപകടകരമായ സാഹചര്യം സൃഷ്ടിക്കുമെന്നും കോടതി ചൂണ്ടിക്കാട്ടി. ഓൺലൈൻ ചൂഷണങ്ങൾക്ക് ഇരയായ കുട്ടികൾ ശിക്ഷിക്കപ്പെടുമെന്ന ഭയത്താൽ വിവരം പുറത്തുപറയാതിരിക്കാനും സാധ്യതയുണ്ട്. ഇത് പോക്സോ നിയമത്തിന്റെ ലക്ഷ്യത്തെ ബാധിക്കുമെന്നും കോടതി നിരീക്ഷിച്ചു.
പ്രായപരിധി പരിശോധിക്കുന്നതിന്റെ പേരിൽ വ്യക്തിഗത വിവരങ്ങൾ ശേഖരിക്കുന്നത് സ്വകാര്യതാ പ്രശ്നങ്ങൾക്ക് ഇടയാക്കുമെന്നും കോടതി ചൂണ്ടിക്കാട്ടി.
പൂർണ നിരോധനത്തിന് പകരം മാതാപിതാക്കളുടെ മേൽനോട്ടവും കുട്ടികൾക്കായുള്ള പ്രത്യേക സുരക്ഷാ സംവിധാനങ്ങളുമാണ് പരിഗണിക്കേണ്ടത്. കുട്ടികളുടെ അക്കൗണ്ടുകൾ സ്വകാര്യമായി സൂക്ഷിക്കുക, മുതിർന്നവരിൽ നിന്നുള്ള സന്ദേശങ്ങൾ നിയന്ത്രിക്കുക, പരസ്യങ്ങൾക്ക് നിയന്ത്രണം ഏർപ്പെടുത്തുക, കുട്ടികളെ ചൂഷണം ചെയ്യുന്ന ദൃശ്യങ്ങൾ കണ്ടെത്തി നീക്കം ചെയ്യുക തുടങ്ങിയ സുരക്ഷാ നടപടികളും നിർദേശങ്ങളിൽ ഉൾപ്പെടുന്നു.
