കോഴിക്കോട്: താമരശ്ശേരി ചെക്ക് പോസ്റ്റിന് സമീപം കാറിടിച്ച് കാൽനടയാത്രക്കാരനായ യുവാവിന് ഗുരുതരമായി പരുക്കേറ്റു. താമരശ്ശേരി ചുങ്കം കയ്യേലിക്കുന്നുമ്മൽ സ്വദേശി ജിതേഷ് (36) നാണ് പരുക്കേറ്റത്. തലയ്ക്കും ശരീരമാസകലവും പരുക്കേറ്റ ജിതേഷിനെ കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
വയനാട് ഭാഗത്തുനിന്ന് കോഴിക്കോട് ഭാഗത്തേക്ക് തെറ്റായ ദിശയിൽ അമിതവേഗത്തിലെത്തിയ കാറാണ് അപകടമുണ്ടാക്കിയത്. ബത്തേരി സ്വദേശിയാണ് കാർ ഓടിച്ചിരുന്നതെന്നാണ് വിവരം. ഇടിയുടെ ആഘാതത്തിൽ കാറിന്റെ മുൻഭാഗത്തെ ചില്ല് തകർന്നു.
അപകടത്തിൽ ഗുരുതരമായി പരുക്കേറ്റ ജിതേഷിനെ ആദ്യം താമരശ്ശേരി താലൂക്ക് ആശുപത്രിയിൽ എത്തിച്ച് പ്രാഥമിക ചികിത്സ നൽകി. തുടർന്ന് വിദഗ്ധ ചികിത്സയ്ക്കായി കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റുകയായിരുന്നു.
