തിരുവനന്തപുരം: ലയണൽ മെസ്സിയെ കേരളത്തിലെത്തിക്കാമെന്ന പേരിൽ നടന്ന തട്ടിപ്പ് കേസിൽ മുൻ കായിക മന്ത്രി വി. അബ്ദുറഹിമാന്റെ പങ്കും പ്രത്യേക അന്വേഷണ സംഘം പരിശോധിക്കുന്നു. ഔദ്യോഗിക പദവി ദുരുപയോഗം ചെയ്തോ, സ്പോൺസർക്ക് അന്യായമായ സാമ്പത്തിക നേട്ടമുണ്ടാക്കാൻ സഹായിച്ചോ എന്നതടക്കമുള്ള കാര്യങ്ങളാണ് പരിശോധിക്കുന്നത്.
മന്ത്രിയുടെ ഓഫീസിൽനിന്നുള്ള കത്തിടപാടുകൾ, ടെൻഡർ നടപടികളില്ലാതെ റിപ്പോർട്ടർ ബ്രോഡ്കാസ്റ്റിംഗ് കമ്പനിയെ സ്പോൺസറായി തെരഞ്ഞെടുത്തത്, അർജന്റീന ഫുട്ബോൾ അസോസിയേഷനുമായുള്ള ചർച്ചകൾക്കായി നടത്തിയ വിദേശയാത്ര എന്നിവയും അന്വേഷണത്തിന്റെ പരിധിയിലാണ്.
തിരുവനന്തപുരത്തുനിന്ന് മലപ്പുറത്തെത്തിയ എസ്.ഐ.ടി സംഘം നോട്ടീസ് നൽകിയ ശേഷമാണ് വി. അബ്ദുറഹിമാന്റെ മൊഴി രേഖപ്പെടുത്തിയത്. മൊഴിയും അന്വേഷണത്തിൽ ലഭിച്ച രേഖകളും വിശദമായി പരിശോധിച്ച ശേഷമായിരിക്കും അദ്ദേഹത്തെ പ്രതി ചേർക്കുന്നതിൽ അന്തിമ തീരുമാനം.
കേസിൽ പ്രാഥമിക റിപ്പോർട്ട് ഡി.ജി.പിക്ക് കൈമാറിയിട്ടുണ്ട്. അഴിമതി നിരോധന നിയമപ്രകാരം കേസെടുത്ത് അന്വേഷണം നടത്തണമെന്ന ശുപാർശയും റിപ്പോർട്ടിലുണ്ടെന്നാണ് വിവരം.
വഴിവിട്ട സഹായം നൽകിയതിൽ മറ്റാർക്കെങ്കിലും പങ്കുണ്ടോ, സാമ്പത്തിക ഇടപാടുകളിൽ ആരുടെയൊക്കെ പങ്കാളിത്തമുണ്ടോ തുടങ്ങിയ കാര്യങ്ങളിലാണ് തുടർ അന്വേഷണത്തിലൂടെ എസ്.ഐ.ടി ഉത്തരം തേടുന്നത്.
