കോഴിക്കോട്: നടുവണ്ണൂർ കുരുടിമുക്കിൽ റോഡ് മുറിച്ചുകടക്കുന്നതിനിടെ ട്രാവലർ ഇടിച്ച് യുവതിക്ക് ഗുരുതര പരുക്ക്.
പറമ്പത്ത് ഏലത്തിൽ സുബൈദയ്ക്കാണ് സാരമായി പരുക്കേറ്റത്. ഇന്നലെ രാവിലെയായിരുന്നു അപകടം.
കുരുടിമുക്കിലെ സീബ്രാ ലൈനിന് സമീപം റോഡ് മുറിച്ചുകടക്കുന്നതിനിടെയാണ് സുബൈദയെ ട്രാവലർ ഇടിച്ചത്. ഇടിയുടെ ആഘാതത്തിൽ റോഡിലേക്ക് വീണ യുവതിയുടെ കാലിലൂടെ ട്രാവലറിന്റെ മുൻവശത്തെ ടയർ കയറിയിറങ്ങി.
സീബ്രാ ലൈനിന് മുകളിൽ സ്വകാര്യ ബസ് നിയമം ലംഘിച്ച് നിർത്തിയിട്ടതും ട്രാവലർ ഡ്രൈവർ അശ്രദ്ധമായി വാഹനമോടിച്ചതുമാണ് അപകടത്തിന് കാരണമെന്ന് ദൃക്സാക്ഷികൾ പറഞ്ഞു.
അപകടത്തിന് പിന്നാലെ നാട്ടുകാരും വ്യാപാരികളും ചേർന്ന് സുബൈദയെ ആശുപത്രിയിലെത്തിച്ചു. നിലവിൽ കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിലാണ്.
അപകടത്തിന്റെ സി.സി.ടി.വി ദൃശ്യങ്ങളും പുറത്തുവന്നിട്ടുണ്ട്.
