തൃശ്ശൂർ: കുന്നംകുളത്ത് ഒരു കുടുംബത്തിലെ നാല് പേർ ആത്മഹത്യയ്ക്ക് ശ്രമിച്ച സംഭവത്തിൽ രണ്ട് പേർ മരിച്ചു. കുന്നംകുളം സ്വദേശി സിബി, മകൾ അലീന എന്നിവരാണ് മരിച്ചത്. ഭാര്യ ബീനയും മകൻ ആദിത്യനും ആശുപത്രിയിൽ ചികിത്സയിലാണ്.
പ്രവാസിയായിരുന്ന സിബി ജോലി നഷ്ടപ്പെട്ട് നാട്ടിലേക്ക് മടങ്ങിയെത്തിയ ദിവസമാണ് ദുരന്തം നടന്നത്. വിഷം കഴിച്ച ശേഷം സിബി കിണറ്റിൽ ചാടിയെന്നാണ് പൊലീസ് പറയുന്നത്. മകൾ അലീനയെ വിഷം കഴിച്ച് തൂങ്ങിമരിച്ച നിലയിലും, ഭാര്യ ബീനയെ വിഷം കഴിച്ച് ആത്മഹത്യയ്ക്ക് ശ്രമിച്ച നിലയിലുമാണ് കണ്ടെത്തിയത്.
ഭയന്നുപോയ മകൻ ആദിത്യനാണ് പൊലീസിനെ വിവരമറിയിച്ചത്. വിഷം കഴിച്ച നിലയിലായിരുന്ന ആദിത്യനെയും ആശുപത്രിയിൽ പ്രവേശിപ്പിച്ചു.
സംഭവസ്ഥലത്ത് നിന്ന് ആത്മഹത്യാക്കുറിപ്പ് കണ്ടെത്തിയതായി പൊലീസ് അറിയിച്ചു. സംഭവത്തിൽ പൊലീസ് അന്വേഷണം തുടരുകയാണ്.
(ആത്മഹത്യ ഒന്നിനും പരിഹാരമല്ല. അതിജീവിക്കാൻ ശ്രമിക്കുക. മാനസികാരോഗ്യ വിദഗ്ധരുടെ സഹായം തേടുക. അത്തരം ചിന്തകളുളളപ്പോള് ‘ദിശ’ ഹെല്പ് ലൈനില് വിളിക്കുക. ടോള് ഫ്രീ നമ്പര്: Toll free helpline number: 1056, 0471-2552056)
