കൊച്ചി: അങ്കമാലിയിൽ പൊട്ടിക്കിടന്ന വൈദ്യുതി ലൈനിൽ നിന്ന് ഷോക്കേറ്റ് ഏഴ് കുറുനരികൾ ചത്തു. അങ്കമാലി നഗരസഭയുടെ പതിനാലാം വാർഡിലെ തിരുനായത്തോട് ഭാഗത്ത് ശബരി റെയിൽപാതയോട് ചേർന്നുള്ള പാടശേഖരത്തിലാണ് സംഭവം.
കാറ്റിലും മഴയിലും വൈദ്യുതി ലൈൻ പൊട്ടി വീണതിനെ തുടർന്നാണ് കുറുനരികൾ ഷോക്കേറ്റ് ചത്തതെന്നാണ് പ്രാഥമിക നിഗമനം.
സംഭവം വാർഡ് കൗൺസിലർ കെ.ആർ. സുബ്രൻ അറിയിച്ചതിനെ തുടർന്ന് വനം വകുപ്പ് ഉദ്യോഗസ്ഥർ സ്ഥലത്തെത്തി പരിശോധന നടത്തി. ഡോക്ടർ ഉൾപ്പെട്ട സംഘവും സ്ഥലത്തെത്തി തുടർ നടപടികൾ സ്വീകരിച്ചു.
പരിശോധനകൾ പൂർത്തിയാക്കിയ ശേഷം കുറുനരികളുടെ ജഡങ്ങൾ സമീപത്തെ പുറമ്പോക്ക് ഭൂമിയിൽ സംസ്കരിച്ചു. സംഭവത്തിൽ വനം വകുപ്പും ബന്ധപ്പെട്ട അധികൃതരും കൂടുതൽ അന്വേഷണം നടത്തിവരികയാണ്.
