തിരുവനന്തപുരം: പ്ലസ് വൺ ട്രയൽ അലോട്ട്മെന്റ് പ്രസിദ്ധീകരിച്ചു. പൊതുവിദ്യാഭ്യാസ വകുപ്പിന്റെ വെബ്സൈറ്റിൽ അലോട്ട്മെന്റ് പരിശോധിക്കാവുന്നതാണ്. ആദ്യ അലോട്ട്മെന്റ് പട്ടിക ഓഗസ്റ്റ് മൂന്നിനായിരിക്കും പ്രസിദ്ധീകരിക്കുക.
ഇന്ന് മുതൽ മൂന്ന് ദിവസം വിദ്യാർത്ഥികൾക്ക് അപേക്ഷയിൽ തിരുത്തൽ വരുത്താനും ഓപ്ഷനുകൾ പുനക്രമീകരിക്കാനും സാധിക്കും. ഇതുകൂടി പരിഗണിച്ചാവും ആദ്യ അലോട്ട്മെന്റ് പ്രസിദ്ധീകരിക്കുക. ഓഗസ്റ്റ് 21 ന് ക്ലാസുകൾ തുടങ്ങുന്ന രീതിയിലാണ് അലോട്ട്മെന്റുകൾ ക്രമീകരിച്ചിരിക്കുന്നത്. ഓഗസ്റ്റ് 23 മുതൽ സെപ്റ്റംബർ 30 വരെ സപ്ലിമെന്ററി അലോട്ട്മെന്റ് നടക്കും. സെപ്റ്റംബർ 30നാവും പ്രവേശന നടപടികൾ അവസാനിക്കുക.
സ്‌പോർട്‌സ് ക്വാട്ട പ്രവേശനത്തിനുള്ള ആദ്യ അലോട്ട്മെന്റ് ഓഗസ്റ്റ് മൂന്നിനും അവസാന അലോട്ട്മെന്റ് ഓഗസ്റ്റ് 17നുമായിരിക്കും. കമ്യൂണിറ്റി ക്വാട്ട പ്രവേശനത്തിനുള്ള അപേക്ഷ ഓഗസ്റ്റ് ഒന്ന് മുതൽ സ്‌കൂളുകളിൽ ആരംഭിക്കും. കമ്യൂണിറ്റി ക്വാട്ടയിൽ സപ്ലിമെന്ററി അലോട്ട്‌മെന്റിന് ഓഗസ്റ്റ് 22 മുതൽ അപേക്ഷിക്കാം. റാങ്ക് പട്ടിക ഓഗസ്റ്റ് 25ന് പ്രസിദ്ധീകരിക്കും. അന്ന് തന്നെ പ്രവേശനവും ആരംഭിക്കും. മാനേജ്‌മെൻറ് ക്വാട്ടയിൽ ഓഗസ്റ്റ് ആറ് മുതൽ 20 വരെ വിദ്യാർത്ഥികൾക്ക് പ്രവേശനം നടത്താം. അൺ എയ്ഡഡ് ക്വാട്ട പ്രവേശനം ഓഗസ്റ്റ് ആറ് മുതൽ 20 വരെയാണ്.
ഹൈക്കോടതി ഉത്തരവിനെ തുടർന്ന് ഓൺലൈനായി അപേക്ഷ നൽകാനുള്ള സമയം 18ാം തിയ്യതിയിൽ നിന്ന് 25 വരെ നീട്ടുകയിരുന്നു. സിബിഎസ്ഇ പത്താം ക്ലാസ് ഫലം വരാൻ വൈകിയതിന്റെ പശ്ചാത്തലത്തിലായിരുന്നു കോടതി ഉത്തരവ്
