മഴക്കാലത്തും പകർച്ചവ്യാധി വ്യാപന സാധ്യത ഉയരുന്ന സാഹചര്യത്തിലും ഭക്ഷ്യസുരക്ഷ ഉറപ്പാക്കാൻ തിരുവനന്തപുരം നഗരസഭയുടെ വ്യാപക പരിശോധന. നഗരസഭാ പരിധിയിലെ ഭക്ഷ്യവിതരണ ശാലകളിൽ നടത്തിയ പരിശോധനയിൽ ഗുരുതര ന്യൂനതകൾ കണ്ടെത്തിയ 48 സ്ഥാപനങ്ങൾക്ക് നോട്ടീസ് നൽകി.
നഗരസഭയുടെ പത്തോളം ഹെൽത്ത് സ്ക്വാഡുകൾ പങ്കെടുത്ത പരിശോധനയിൽ ആകെ 95 സ്ഥാപനങ്ങളാണ് പരിശോധിച്ചത്. ശുചിത്വ മാനദണ്ഡങ്ങൾ പാലിക്കാത്തതും മറ്റ് ക്രമക്കേടുകളും കണ്ടെത്തിയ സ്ഥാപനങ്ങളിൽ നിന്ന് പിഴയായി 57,500 രൂപ ഈടാക്കി.
പഴകിയ ഭക്ഷണം വിൽപ്പനയ്ക്കായി സൂക്ഷിച്ചിരുന്ന സ്ഥാപനങ്ങൾക്കെതിരെയും നടപടി സ്വീകരിച്ചു. പരിശോധന തുടരുന്ന സാഹചര്യത്തിൽ ഹോട്ടലുകളിലെ സാഹചര്യം മെച്ചപ്പെട്ടില്ലെങ്കിൽ കൂടുതൽ കർശന നടപടികൾ സ്വീകരിക്കുമെന്ന് അധികൃതർ മുന്നറിയിപ്പ് നൽകി.
ജലജന്യ രോഗങ്ങളും മഴക്കാല പൂർവ രോഗങ്ങളും നിയന്ത്രിക്കുന്നതിന്റെ ഭാഗമായാണ് പരിശോധന നടത്തിയത്. ശുചിത്വനിലവാരം ഉറപ്പാക്കാൻ മേയർ വി.വി. രാജേഷിന്റെയും ആരോഗ്യകാര്യ സ്ഥിരം സമിതി അധ്യക്ഷൻ എം.ആർ. ഗോപന്റെയും നിർദേശപ്രകാരമായിരുന്നു നടപടി.
നഗരസഭ സെക്രട്ടറി കെ.യു. ബിനി, ഹെൽത്ത് ഓഫീസർ ഡോ. പ്രേം നവാസ് കെ.ബി, ക്ലീൻ സിറ്റി മാനേജർമാരായ മോഹനചന്ദ്രൻ ടി, സുജിത്ത് സുധാകർ എന്നിവരുടെ നേതൃത്വത്തിലായിരുന്നു പരിശോധന.
ഹോട്ടലുകളിൽ തിളപ്പിച്ചാറിയ കുടിവെള്ളം മാത്രമേ നൽകാവൂവെന്നും സ്ഥാപനങ്ങളും പരിസരവും പൂർണ ശുചിത്വത്തോടെ പരിപാലിക്കണമെന്നും നഗരസഭ നിർദേശം നൽകി.
അതേസമയം, വീടുകളിലും പരിസരങ്ങളിലും വെള്ളം കെട്ടിക്കിടന്ന് കൊതുക് പെരുകാൻ ഇടയാക്കുന്ന സാഹചര്യങ്ങൾ ഒഴിവാക്കണമെന്നും സാംക്രമിക രോഗങ്ങൾ തടയാൻ പൊതുജനങ്ങളുടെ സഹകരണം അനിവാര്യമാണെന്നും മേയർ അഭ്യർഥിച്ചു.
