മലപ്പുറത്ത് കോളേജ് വിദ്യാര്‍ഥിനികളുടെ ഓണാഘോഷ ചിത്രങ്ങള്‍ അശ്ലീലമായി മോര്‍ഫ് ചെയ്ത് വ്യാജ അക്കൗണ്ടുകൾ വഴി പ്രചരിപ്പിച്ച സംഭവത്തില്‍ സൈബര്‍ പോലീസ് കേസെടുത്ത് അന്വേഷണം ആരംഭിച്ചു. ജില്ലയിലെ പന്ത്രണ്ടോളം കോളജുകളിലെ വിദ്യാര്‍ഥിനികളാണ് സൈബര്‍ ആക്രമണത്തിന് ഇരയായിരിക്കുന്നത്.
- ചിത്രങ്ങൾ ചോർത്തിയത് എങ്ങനെ: ഇൻസ്റ്റാഗ്രാം, ഫേസ്ബുക്ക് തുടങ്ങിയ സാമൂഹ്യ മാധ്യമങ്ങളില്‍ വിദ്യാര്‍ഥിനികൾ പങ്കുവെച്ച ഓണാഘോഷ ചിത്രങ്ങൾക്ക് പുറമെ, കോളേജ് വാട്‌സാപ്പ് ഗ്രൂപ്പുകളിലെ ഫോട്ടോകളും ചോര്‍ത്തി ദുരുപയോഗം ചെയ്തതായാണ് സംശയിക്കുന്നത്. ആസൂത്രിതവും സംഘടിതവുമായ അന്വേഷണത്തിലൂടെ മാത്രമേ കുറ്റവാളികളെ കണ്ടെത്താനാകൂ എന്ന നിഗമനത്തിലാണ് പൊലീസ്.
- ‘ഹരിത’യുടെ ഇടപെടൽ: സംഭവത്തില്‍ ബാധിതരായ വിദ്യാര്‍ഥിനികള്‍ക്ക് പൂര്‍ണ്ണ നിയമസഹായവുമായി മുസ്ലിം ലീഗ് വിദ്യാർത്ഥി സംഘടനയായ എംഎസ്എഫിന്റെ വനിതാ വിഭാഗമായ ‘ഹരിത’ രംഗത്തെത്തിയിട്ടുണ്ട്. ഹരിത ഭാരവാഹികള്‍ മലപ്പുറം ജില്ലാ പൊലീസ് മേധാവിക്ക് നേരിട്ട് പരാതി നല്‍കി. വിഷയം ചൂണ്ടിക്കാട്ടി സംസ്ഥാന ആഭ്യന്തര മന്ത്രിക്കും പരാതി കൈമാറുമെന്ന് ഭാരവാഹികൾ അറിയിച്ചിട്ടുണ്ട്.
- നിയമനടപടി കർശനമാക്കും: മോര്‍ഫിങ്ങിനിരയായ കൂടുതല്‍ വിദ്യാര്‍ഥിനികള്‍ അതത് പോലീസ് സ്റ്റേഷനുകളില്‍ നേരിട്ട് പരാതി നല്‍കാന്‍ ഒരുങ്ങുകയാണ്. വ്യാജ അക്കൗണ്ടുകള്‍ നിര്‍മ്മിച്ച് പെണ്‍കുട്ടികളുടെ ചിത്രങ്ങള്‍ വ്യാപകമായി പ്രചരിപ്പിക്കുന്ന സംഘങ്ങൾക്കെതിരെ ശക്തമായ നടപടി വേണമെന്ന ആവശ്യം ഇതിനോടകം ശക്തമായിട്ടുണ്ട്.
