കോഴിക്കോട്: സംസ്ഥാന സ്കൂൾ കായികമേളയിലെ ഭക്ഷണത്തിൽനിന്ന് പുഴുവിനെ ലഭിച്ചെന്ന ആരോപണത്തിൽ വിശദീകരണവുമായി കായിക അധ്യാപകൻ ജിജോ ജെയിംസ്. തനിക്ക് ലഭിച്ചത് ജീവനുള്ള പുഴുവാണെന്ന് ആരാണ് പറഞ്ഞതെന്ന് അദ്ദേഹം ചോദിച്ചു. അത്തരത്തിൽ താൻ പറഞ്ഞതിന് തെളിവുണ്ടെങ്കിൽ ഹാജരാക്കട്ടെയെന്നും കോഴിക്കോട് മാധ്യമങ്ങളോട് ജിജോ പ്രതികരിച്ചു.
അന്ന് താൻ നടത്തിയ പ്രതികരണം ശരിയോ തെറ്റോ എന്ന് കോടതി തീരുമാനിക്കട്ടെയെന്നും കോടതിയിലും ഡിപ്പാർട്ട്മെന്റിലും വിശ്വാസമുണ്ടെന്നും അദ്ദേഹം പറഞ്ഞു. സംഭവത്തിലെ സത്യം പുറത്തുവരണമെന്നത് തന്റെ കൂടി ആവശ്യമാണെന്നും ജിജോ വ്യക്തമാക്കി.
പെരുമ്പാവൂരിലെ ഒരു ചെറിയ സ്കൂളിൽനിന്ന് വലിയ കായികമേളയിൽ പങ്കെടുക്കാൻ നിരവധി വിദ്യാർഥികളുമായി എത്തിയതിന്റെ അനുഭവവും അദ്ദേഹം പങ്കുവച്ചു. സ്കൂളിന് ഒൻപത് പോയിന്റ് ലഭിച്ചെങ്കിലും ആ നേട്ടത്തിൽ അഭിമാനത്തോടെ തല ഉയർത്തി മടങ്ങാൻ കഴിഞ്ഞില്ല. തനിക്കും കുടുംബത്തിനും വലിയ മാനസിക വ്യഥയും നഷ്ടവുമുണ്ടായെന്നും ഇതിനെല്ലാം ആര് മറുപടി പറയുമെന്നും ജിജോ ചോദിച്ചു.
തന്റെ നിരപരാധിത്വം എല്ലാവരുടെയും മുന്നിൽ തെളിയിക്കാനുള്ള ഏക മാർഗം സത്യം പുറത്തുവരികയാണെന്നും അദ്ദേഹം കൂട്ടിച്ചേർത്തു. സംഭവത്തിൽ ഗൂഢാലോചന നടന്നുവെന്ന ആരോപണത്തോടും ജിജോ പ്രതികരിച്ചു. ആരാണ് ഗൂഢാലോചന നടത്തിയതെന്ന് തെളിയട്ടെയെന്നും തന്റെ ഫോൺ ഉൾപ്പെടെ പൊലീസിന്റെ കൈവശമുണ്ടെന്നും അത് പരിശോധിക്കട്ടെയെന്നും അദ്ദേഹം പറഞ്ഞു.
കായികമേളയിലെ ഭക്ഷണ വിവാദം സംബന്ധിച്ച ആരോപണങ്ങളും തുടർന്നുണ്ടായ നടപടികളും നിലനിൽക്കുന്നതിനിടെയാണ് ജിജോ ജെയിംസിന്റെ വിശദീകരണം. സംഭവത്തിൽ അന്വേഷണം പൂർത്തിയായി വസ്തുതകൾ പുറത്തുവരണമെന്നാണ് അദ്ദേഹത്തിന്റെ ആവശ്യം.
