തിരുവനന്തപുരം: ശബരിമല സ്വർണക്കൊള്ള കേസിൽ തിരുവിതാംകൂർ ദേവസ്വം ബോർഡിന്റെ മുൻ പ്രസിഡന്റ് പി.എസ്. പ്രശാന്തിനെ പ്രത്യേക അന്വേഷണസംഘം കസ്റ്റഡിയിലെടുത്തു.
2025-ൽ ശബരിമലയിലെ ദ്വാരപാലക ശിൽപ്പങ്ങൾ ചെന്നൈയിലേക്ക് കൊണ്ടുപോയ സംഭവവുമായി ബന്ധപ്പെട്ട കേസിലാണ് പി.എസ്. പ്രശാന്തിനെ പ്രതിചേർത്തിരിക്കുന്നത്. കേസിൽ മുരാരി ബാബു ഒന്നാം പ്രതിയും, ഉണ്ണികൃഷ്ണൻ പോറ്റി രണ്ടാം പ്രതിയും, പങ്കജ് ഭണ്ഡാരി മൂന്നാം പ്രതിയുമാണ്. അജി കുമാറും കണ്ഠരർ രാജീവരും ഉൾപ്പെടെ മറ്റ് പ്രതികളും കേസിലുണ്ട്.
പ്രശാന്തിനെതിരെ ക്രിമിനൽ ഗൂഢാലോചനയ്ക്ക് പ്രാഥമിക തെളിവുകളുണ്ടെന്ന് ഹൈക്കോടതി നേരത്തേ കണ്ടെത്തിയിരുന്നു. അന്വേഷണത്തിൽ ശേഖരിച്ച തെളിവുകൾ പ്രകാരം പ്രതികളുടെ പങ്കാളിത്തം വ്യക്തമായി തെളിഞ്ഞതായി പ്രത്യേക അന്വേഷണസംഘത്തിന്റെ റിപ്പോർട്ടിൽ പറയുന്നു. മുൻകൂട്ടി ആസൂത്രണം ചെയ്ത ഗൂഢാലോചനയുടെ ഭാഗമായാണ് പ്രതികൾ പ്രവർത്തിച്ചതെന്നും, വിശ്വാസവഞ്ചന, രേഖാ വ്യാജം, ക്രിമിനൽ ഗൂഢാലോചന എന്നിവ ഉൾപ്പെടെയുള്ള കുറ്റങ്ങൾ ചുമത്തിയിട്ടുണ്ടെന്നും റിപ്പോർട്ടിൽ വ്യക്തമാക്കുന്നു.
അതേസമയം, ചെയ്യാത്ത കുറ്റത്തിനാണ് തന്നെ ക്രൂശിക്കുന്നതെന്ന് ആരോപിച്ച് പി.എസ്. പ്രശാന്ത് ഫേസ്ബുക്കിൽ പ്രതികരിച്ചിരുന്നു. എല്ലാ സംഭവങ്ങൾക്കും പിന്നിൽ ഉണ്ണികൃഷ്ണൻ പോറ്റിയാണെന്നും, ശ്രീകോവിലിന് മുന്നിൽ കണ്ട അശുദ്ധി മാറ്റാൻ ശ്രമിച്ചതാണോ തങ്ങൾ ചെയ്ത തെറ്റെന്നും അദ്ദേഹം പോസ്റ്റിൽ ചോദിച്ചിരുന്നു. ഈ പ്രതികരണത്തിന് മണിക്കൂറുകൾക്കുശേഷമാണ് പ്രത്യേക അന്വേഷണസംഘം അദ്ദേഹത്തെ കസ്റ്റഡിയിലെടുത്തത്.
