ഇനി മുതല് വോയ്സ് കോളുകള്ക്കും എസ്എംഎസുകള്ക്കും മാത്രമായുള്ള പ്രത്യേക റീചാര്ജ് പ്ലാനുകള് ടെലികോം കമ്പനികള് അവതരിപ്പിക്കണമെന്ന് ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്) ഉത്തരവിട്ടു. ട്രായ് നടത്തിയ ഒരു സര്വേയുടെ അടിസ്ഥാനത്തിലാണ് ഇത്തരം മാറ്റങ്ങള്.
ട്രായ് നടത്തിയ സര്വേയില് രാജ്യത്ത് 15 കോടിയിലധികം ആളുകള് ഇപ്പോഴും 2G കണക്ഷന് ഉപയോഗിക്കുന്നതായി കണ്ടെത്തി. ഇവര്ക്ക് ഇന്റര്നെറ്റ് ആവശ്യമില്ലെങ്കിലും നിലവിലുള്ള പ്ലാനുകളില് ഡാറ്റയും ഉള്പ്പെടുത്തിയിരിക്കുന്നതിനാല് അതിന്റെ പണം നല്കേണ്ടി വരുന്നു.
ഈ സാഹചര്യം പരിഹരിക്കുന്നതിനും ഉപഭോക്താക്കളുടെ താല്പ്പര്യം സംരക്ഷിക്കുന്നതിനുമായാണ് ട്രായ് ഈ തീരുമാനം എടുത്തത്. ഇതിനായി വോയിസ്, എസ്.എം.എസ്. സേവനത്തിനുമാത്രമായി ഒരു സ്പെഷ്യല് താരിഫ് വൗച്ചറെങ്കിലും പുറത്തിറക്കണമെന്ന നിര്ദേശവുമായി 2012-ലെ ടെലികോം ഉപഭോക്തൃ സംരക്ഷണ നിയന്ത്രണ ചട്ടങ്ങള് ഭേദഗതി ചെയ്താണ് ഉത്തരവിറക്കിയത്.
ഈ മാറ്റം ഇന്റര്നെറ്റ് അധികം ഉപയോഗിക്കാത്ത ഫീച്ചര് ഫോണ് ഉപയോക്താക്കള്ക്കും ഒരു സിം കാര്ഡ് വോയ്സ് കോളുകള്ക്കും മറ്റൊന്ന് ഡാറ്റയ്ക്കുമായി ഉപയോഗിക്കുന്നവര്ക്കും വലിയ ആശ്വാസമാകും. കാരണം ഇനി അവര്ക്ക് ആവശ്യമില്ലാത്ത ഡാറ്റയ്ക്ക് പണം നല്കേണ്ടി വരില്ല. ഇന്റര്നെറ്റ് അധികം ഉപയോഗിക്കാത്ത പ്രായമായവര്ക്കും, ഇന്റര്നെറ്റ് സൗകര്യം പരിമിതമായ പ്രദേശങ്ങളിലോ ഇത്തരം റീചാര്ജ് പ്ലാനുകളാണ് നല്ലതെന്നാണ് ട്രായ് നടത്തിയ സര്വേ വ്യക്തമാക്കുന്നത്. വോയ്സ് കോളുകള്ക്കും എസ്എംഎസുകള്ക്കും മാത്രമായുള്ള പ്രത്യേക റീചാര്ജ് പ്ലാനുകള്ക്ക് പരമാവധി 365 ദിവസം വരെ വാലിഡിറ്റി ഉണ്ടായിരിക്കും അതോടൊപ്പം പത്തു രൂപയുടെ ഗുണിതങ്ങള് ടോപ്പപ്പിനായി വേണമെന്ന നിബന്ധനയും ഒഴിവാക്കിയിട്ടുണ്ട്.
