കൊൽക്കത്ത: പശ്ചിമ ബംഗാളിൽ കന്നുകാലി മോഷണം ആരോപിച്ചുണ്ടായ ആൾക്കൂട്ട ആക്രമണത്തിൽ രണ്ടുപേർ കൊല്ലപ്പെട്ടു. മൂന്ന് പേർക്ക് ഗുരുതരമായി പരിക്കേറ്റു.
ഉത്തർ ദിനാജ്പൂർ സ്വദേശി സാഹിദ് അക്തർ, ഹരിയാന സ്വദേശി ഷാദ് മുഹമ്മദ് എന്നിവരാണ് കൊല്ലപ്പെട്ടത്.
സിലിഗുരിക്ക് സമീപം മാട്ടിഗാര–ബാഗ്‌ദോഗ്ര മേഖലയിലാണ് സംഭവം. പിക്കപ്പ് വാനിലും കാറിലുമായി എത്തിയ സംഘത്തെ നാട്ടുകാർ തടഞ്ഞുനിർത്തി ആക്രമിക്കുകയായിരുന്നുവെന്നാണ് പൊലീസിന്റെ പ്രാഥമിക വിവരം.
പ്രദേശത്ത് സമീപ ആഴ്ചകളിൽ കന്നുകാലി മോഷണങ്ങൾ റിപ്പോർട്ട് ചെയ്തിരുന്നതാണ് ആക്രമണത്തിന് കാരണമെന്നാണ് വിവരം.
ആക്രമണത്തിനിടെ പിക്കപ്പ് വാനിന് അക്രമികൾ തീയിട്ടതായും റിപ്പോർട്ടുണ്ട്.
ഗുരുതരമായി പരിക്കേറ്റ അമീർ സത്താർ, അക്രം ഖാൻ, ആരിഫ് ഖാൻ എന്നിവരെ നോർത്ത് ബംഗാൾ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
ഇന്നലെ നടന്ന സംഭവത്തിൽ പൊലീസ് അന്വേഷണം ആരംഭിച്ചു. പ്രദേശത്തെ സിസിടിവി ദൃശ്യങ്ങൾ കേന്ദ്രീകരിച്ചാണ് ആദ്യഘട്ട അന്വേഷണം.
ആക്രമണത്തിൽ പങ്കുണ്ടെന്ന് സംശയിക്കുന്ന നാല് പേരെ പൊലീസ് അറസ്റ്റ് ചെയ്തതായും റിപ്പോർട്ടുണ്ട്.
സംഭവത്തിൽ സർക്കാരിനെതിരെ വിമർശനവുമായി തൃണമൂൽ കോൺഗ്രസും സിപിഐഎമ്മും രംഗത്തെത്തി. സംഭവത്തിൽ കൃത്യമായ അന്വേഷണം വേണമെന്നാണ് ടിഎംസിയുടെ ആവശ്യം.
അതേസമയം, സംഭവത്തെ അപലപിച്ച ബിജെപി ജനങ്ങൾ നിയമം കയ്യിലെടുക്കരുതെന്നും ആൾക്കൂട്ട ആക്രമണങ്ങളിൽ നിന്ന് പിന്തിരിയണമെന്നും ആവശ്യപ്പെട്ടു.
ആൾക്കൂട്ട ആക്രമണത്തിൽ രണ്ട് പേർ കൊല്ലപ്പെട്ട സംഭവത്തിൽ കൂടുതൽ അറസ്റ്റുകൾ ഉണ്ടാകുമോയെന്നും ആക്രമണത്തിന് പിന്നിലെ യഥാർഥ കാരണം എന്താണെന്നും കണ്ടെത്താനുള്ള അന്വേഷണത്തിലാണ് പൊലീസ്.
