കൊച്ചി റെയിൽവേ സ്റ്റേഷനിൽ നടത്തിയ പരിശോധനയിൽ പ്രത്യേക അനുമതി ആവശ്യമായ 46 ഗുളികകളുമായി പശ്ചിമബംഗാൾ സ്വദേശി പിടിയിൽ. ബസിർഹട്ട് സ്വദേശി സസാക് കയാൽ ആണ് റെയിൽവേ പ്രൊട്ടക്‌ഷൻ ഫോഴ്‌സിന്റെ പിടിയിലായത്.
രഹസ്യവിവരത്തിന്റെ അടിസ്ഥാനത്തിൽ നടത്തിയ പരിശോധനയിലാണ് ഇയാളുടെ കൈവശം ഗുളികകൾ കണ്ടെത്തിയത്. ഡോക്ടറുടെ അനുമതിയോടെ മാത്രം വാങ്ങാനും ഉപയോഗിക്കാനും കഴിയുന്ന മരുന്നുകളാണ് പിടിച്ചെടുത്തതെന്ന് ആർ.പി.എഫ് അധികൃതർ വ്യക്തമാക്കി.
ആർ.പി.എഫ് തിരുവനന്തപുരം സീനിയർ ഡിവിഷനൽ സെക്യൂരിറ്റി കമ്മിഷണർ മുഹമ്മദ് ഹനീഫിന്റെ നേതൃത്വത്തിലായിരുന്നു പരിശോധന. എസ്.ഐ പ്രെയ്സ് മാത്യു, ഹെഡ് കോൺസ്റ്റബിൾ ജി. വിപിൻ, കോൺസ്റ്റബിൾമാരായ എം.ആർ. മനോജ്, നിഖിൽ നാഥ് എന്നിവരടങ്ങിയ സംഘമാണ് സസാക് കയാലിനെ പിടികൂടിയത്.
പിടിയിലായയാളെ തുടർനടപടികൾക്കായി ബന്ധപ്പെട്ട അധികൃതർക്ക് കൈമാറി. സംഭവത്തിൽ കൂടുതൽ അന്വേഷണം തുടരുകയാണ്.
