കൊച്ചി: യൂട്യൂബർ ‘തൊപ്പി’ എന്നറിയപ്പെടുന്ന നിഹാദിനെതിരെ എറണാകുളം റൂറൽ സൈബർ പൊലീസ് ലുക്ക് ഔട്ട് സർക്കുലർ പുറത്തിറക്കി. യൂട്യൂബിലൂടെ അശ്ലീല ദൃശ്യങ്ങൾ പ്രചരിപ്പിച്ചെന്ന കേസിൽ നിഹാദ് ഒളിവിലാണെന്നാണ് പൊലീസിന്റെ വിലയിരുത്തൽ. മുൻകൂർ ജാമ്യഹർജിയെ പൊലീസ് നേരത്തെ എതിർത്തിരുന്നു. ഇതിന് പിന്നാലെയാണ് രാജ്യം വിടുന്നത് ഉൾപ്പെടെയുള്ള സാധ്യതകൾ മുൻനിർത്തി ലുക്ക് ഔട്ട് സർക്കുലർ പുറത്തിറക്കിയത്.
അശ്ലീല ദൃശ്യങ്ങൾ പങ്കുവെച്ചെന്ന ആരോപണത്തെ തുടർന്ന് നിഹാദിന്റെ യൂട്യൂബ് ചാനൽ നേരത്തെ നീക്കം ചെയ്തിരുന്നു. ഗെയിമിങ് ലൈവ് സ്ട്രീമുകളിലൂടെയാണ് തൊപ്പിയും സംഘവും വലിയ പ്രേക്ഷകശ്രദ്ധ നേടിയത്. പ്രായപൂർത്തിയാകാത്ത കുട്ടികൾ ഉൾപ്പെടെ നിരവധി പേരാണ് ഇവരുടെ ഉള്ളടക്കം പിന്തുടർന്നിരുന്നത്. തുടക്കം മുതൽ ഉപയോഗിച്ചിരുന്ന ഭാഷയും അവതരണ ശൈലിയും വിവാദങ്ങൾക്കും വിമർശനങ്ങൾക്കും ഇടയാക്കിയിരുന്നു.
പിന്നീട് സുഹൃത്തുക്കൾ തമ്മിലുണ്ടായ പരസ്യ ഏറ്റുമുട്ടലും സമൂഹമാധ്യമങ്ങളിലെ ആരോപണ-പ്രത്യാരോപണങ്ങളും വിവാദം കൂടുതൽ രൂക്ഷമാക്കി. യൂട്യൂബ്, ഗെയിമിങ് വരുമാനത്തിന്റെ പങ്കുവെപ്പുമായി ബന്ധപ്പെട്ട തർക്കമാണ് ഈ സംഘർഷത്തിന് കാരണമായതെന്നാണ് പുറത്തുവന്ന വിവരം.
അതേസമയം, സ്ത്രീത്വത്തെ അപമാനിച്ചെന്ന പരാതിയിൽ തൊപ്പിയുടെ മുൻ സഹപ്രവർത്തകനായ മുഹമ്മദ് മമ്മു, അഥവാ ‘മമ്മു’, നേരത്തെ അറസ്റ്റിലായിരുന്നു. മഞ്ചേരി സ്വദേശിനിയുടെ പരാതിയിലാണ് നടപടി. ഈ കേസിലും നിഹാദ് പ്രതിപ്പട്ടികയിലുണ്ട്.
‘Mrz Shameer’ എന്ന യൂട്യൂബ് ചാനലിൽ ജൂൺ 10-ന് നടന്ന ലൈവ് സ്ട്രീമിനിടെ പരാതിക്കാരിക്കെതിരെ അശ്ലീലവും ലൈംഗിക അധിക്ഷേപപരവുമായ പരാമർശങ്ങൾ നടത്തിയെന്ന പരാതിയിലാണ് കേസ് രജിസ്റ്റർ ചെയ്തത്. ചാനൽ ഉടമ ഷമീർ, ജാസി, മുഹമ്മദ് മമ്മു എന്നിവർ ലൈവിൽ പങ്കെടുത്തിരുന്നുവെന്നാണ് പൊലീസ് പറയുന്നത്. തൊപ്പിയുമായി വേർപിരിഞ്ഞതിന് ശേഷമാണ് ഈ ലൈവ് നടന്നത്. പരാതിക്കാരിക്കെതിരെ നിഹാദ് മുമ്പ് നടത്തിയതായി ആരോപിക്കപ്പെടുന്ന പരാമർശങ്ങളുടെ വീഡിയോയും ഓഡിയോയും ലൈവിൽ പ്രദർശിപ്പിച്ചെന്നും പരാതിയിൽ പറയുന്നു.
രണ്ട് കേസുകളിലും അന്വേഷണം തുടരുകയാണെന്ന് പൊലീസ് അറിയിച്ചു.
