കൊല്ലം: മന്ത്രി ബിന്ദു കൃഷ്ണയുടെ തലയില് ചൂട് പായസം വീണ സംഭവത്തില് അന്വേഷണം. ഡിവൈഎസ്പി റാങ്കില് കുറയാത്ത ഉദ്യോഗസ്ഥന് സംഭവം അന്വേഷിക്കും. അന്വേഷണത്തിന് സംസ്ഥാന പൊലീസ് മേധാവിയാണ് നിര്ദ്ദേശം നല്കിയത്. തിരുവനന്തപുരം റെയിഞ്ച് ഡിഐജിക്കാണ് നിര്ദ്ദേശം നല്കിയത്. സംഭവത്തില് പൊലീസിന് ജാഗ്രത കുറവുണ്ടായെന്നും പരാതിയുണ്ട്.
എന്നാല്, പായസം വീണതില് അസ്വാഭാവികത ഒന്നുമില്ലെന്നും തികച്ചും യാദൃശ്ചികമാണെന്നും മന്ത്രി പ്രതികരിച്ചു. സംസ്ഥാനത്ത് എത്ര കുറ്റകൃത്യങ്ങള് അന്വേഷിക്കാന് കിടക്കുന്നു. പരാതി കിട്ടിയപ്പോള് അന്വേഷിക്കാന് പൊലീസ് തീരുമാനിച്ചതായിരിക്കാം. പക്ഷേ, അന്വേഷിക്കാന് മാത്രം അതില് എന്തെങ്കിലുമുള്ളതായി തനിക്ക് തോന്നുന്നില്ലെന്നും മന്ത്രി പറഞ്ഞു.
പ്രിയദര്ശിനി സൗജന്യ യാത്രയുടെ ഉദ്ഘാടന ചടങ്ങിനിടെ ഉണ്ടായ തിക്കിലും തിരക്കിനുമിടെയാണ് മന്ത്രി ബിന്ദു കൃഷ്ണയുടെ തലയില് ചൂട് പായസം വീണത്. കൊല്ലം കെഎസ്ആര്ടിസി ഡിപ്പോയില്വെച്ച് നടന്ന ചടങ്ങിനിടെയായിരുന്നു സംഭവം. യൂത്ത് കോണ്ഗ്രസിന്റെ നേതൃത്വത്തിലായിരുന്നു പായസ വിതരണം നടന്നിരുന്നത്.
ബസില്വെച്ച് പായസം വിതരണം ചെയ്യുന്നതിനിടെ കൈ തട്ടി മന്ത്രിയുടെ തലയില് വീഴുകയായിരുന്നു. പിന്നാലെ നിലവിളിയോടെ സീറ്റില് നിന്ന് മന്ത്രി ചാടി എഴുന്നേറ്റു. ഒപ്പമുണ്ടായിരുന്നവര് ഷാളും മറ്റും ഉപയോഗിച്ച് മന്ത്രിയുടെ തലയില് വീണ പായസം തുടച്ചുമാറ്റുകയായിരുന്നു. സംഭവത്തിന്റെ ദൃശ്യം പുറത്തുവന്നിരുന്നു.
