സുഹൃത്തുക്കളെ ക്ഷേത്രക്കുളത്തില്‍ മുങ്ങിമരിച്ച നിലയില്‍ കണ്ടെത്തി. അയത്തില്‍ സ്‌നേഹ നഗര്‍ കാവുങ്ങല്‍ പടിഞ്ഞാറ്റതില്‍ ഉണ്ണിയെന്ന ഗിരികുമാര്‍ (57), അയത്തില്‍ ആരതി ജംഗ്ഷന്‍ സുരഭി നഗര്‍171 കാവുംപണ വയലില്‍ വീട്ടില്‍ ചാക്കോ എന്ന അനിയന്‍കുഞ്ഞ് (56) എന്നിവരാണ് മരിച്ചത്. വ്യാഴാഴ്ച രാത്രി 9.30ഓടെ അയത്തില്‍ പുളിയത്തുമുക്ക് പവര്‍ ഹൗസിനടുത്തുള്ള കരുത്തര്‍ മഹാദേവര്‍ ക്ഷേത്രക്കുളത്തിലാണ് അപകടമുണ്ടായത്.
ഇരുവരും കുളക്കരയില്‍ സംസാരിച്ചിരിക്കുന്നതിനിടെ അനിയന്‍കുഞ്ഞ് കുളത്തില്‍ വീഴുകയായിരുന്നു. ഗിരികുമാര്‍ രക്ഷിക്കാന്‍ ഇറങ്ങുകയായിരുന്നു. ഇതിന്റെ ദൃശ്യങ്ങള്‍ പരിസരത്തെ വീട്ടിലെ സിസിടിവിയില്‍നിന്ന് പൊലീസിന് ലഭിച്ചിട്ടുണ്ട്. എന്നാല്‍ അപകടവിവരം പുറത്തറിഞ്ഞത് വെള്ളിയാഴ്ച ഉച്ചയ്ക്കാണ്. വ്യാഴാഴ്ച രാത്രി എട്ടരയോടെ വീടുകളില്‍നിന്നു പുറത്തുപോയ ഇവര്‍ തിരിച്ചെത്താത്തതിനെത്തുടര്‍ന്ന് ബന്ധുക്കള്‍ തിരച്ചില്‍ നടത്തിവരികയായിരുന്നു. ബന്ധുക്കള്‍ വിളിച്ചപ്പോള്‍ അനിയന്‍കുഞ്ഞിന്റെ ഫോണ്‍ സ്വിച്ച് ഓഫ് ആയിരുന്നു. വെള്ളിയാഴ്ച ഉച്ചകഴിഞ്ഞ് മൂന്നുമണിയോടെ ഗിരികുമാറിന്റെ മൃതദേഹം ക്ഷേത്രക്കുളത്തില്‍ പൊങ്ങി.
ഇരവിപുരം എസ്‌ഐ എം അനീഷ് കുമാറിന്റെ നേതൃത്വത്തില്‍ പൊലീസ് ഇന്‍ക്വസ്റ്റ് പൂര്‍ത്തിയാക്കുന്നതിനിടെ അനിയന്‍കുഞ്ഞിന്റെ മൃതദേഹവും കുളത്തില്‍ പൊങ്ങി. മൃതദേഹങ്ങള്‍ ജില്ലാ ആശുപത്രി മോര്‍ച്ചറിയിലേക്ക് മാറ്റി. പോസ്റ്റ്‌മോര്‍ട്ടത്തിനുശേഷം സംസ്‌കരിക്കും.
കൂലിപ്പണിക്കാരനായ അനിയന്‍കുഞ്ഞ് അവിവാഹിതനാണ്. സഹോദരങ്ങള്‍: പരേതനായ റെജി ചാക്കോ, കുഞ്ഞുമോള്‍.
മരിച്ച ഗിരികുമാര്‍ കൊല്ലം ശ്രീനാരായണ കോളേജിലെ റിട്ട. സൂപ്രണ്ടാണ്. ഐ.സി.ഡി.എസ് സൂപ്പര്‍വൈസറായ സീനാഗിരിയാണ് ഭാര്യ. മക്കള്‍: അനന്തു ഗിരി (ഐഡിഎഫ്‌സി ബാങ്ക്, കരിക്കോട്), കൃഷ്ണ ഗിരി (പിജി വിദ്യാര്‍ത്ഥി,പുനലൂര്‍ എസ്എന്‍ കോളേജ്).
