എക്സൈസ് വകുപ്പിൽ വിവാദങ്ങൾ ഒഴിയുന്നുമില്ല. മുൻ എക്സൈസ് കമ്മീഷണർ സീറാം സാംബശിവ റാവുവിനെതിരെ മധ്യമേഖല ജോയിന്റ് കമ്മീഷണർ എസ്. വിനോദ് കുമാർ ചീഫ് സെക്രട്ടറിക്ക് പരാതി നൽകി. തനിക്കെതിരെ ഉന്നയിച്ച കൈക്കൂലി ആരോപണങ്ങൾ അടിസ്ഥാനരഹിതമാണെന്ന് ചൂണ്ടിക്കാണിച്ചാണ് പരാതി നൽകിയിരിക്കുന്നത്.
ഗംഗാ ബാറിൽ നിന്നും താൻ കൈക്കൂലി വാങ്ങിയെന്നത് തികച്ചും വ്യാജമായ ആരോപണമാണെന്ന് എസ്. വിനോദ് കുമാർ വ്യക്തമാക്കുന്നു. ബാർ ഉടമകളുമായോ നടപടിക്രമങ്ങളുമായോ തനിക്ക് യാതൊരു ബന്ധവുമില്ല. ഇൻഫോർമർ പറഞ്ഞ കാര്യമെന്ന രീതിയിലാണ് സീറാം സാംബശിവ റാവു തന്റെ റിപ്പോർട്ടിൽ ഈ ആരോപണം ഉന്നയിച്ചിരിക്കുന്നത്. പ്രാഥമിക അന്വേഷണം പോലും നടത്താതെയാണ് ഈ റിപ്പോർട്ട് തയ്യാറാക്കിയതെന്നും, തന്നോട് വ്യക്തിവൈരാഗ്യമുള്ളതിനാലാണ് ഇത്തരമൊരു നീക്കമെന്നും പരാതിയിൽ ആരോപിക്കുന്നു.
അഴിമതിക്കാരായ ഉദ്യോഗസ്ഥർക്കെതിരെ വിജിലൻസ് അന്വേഷണം ആവശ്യപ്പെടുന്ന റിപ്പോർട്ട് പുറത്തുവന്നതിന് പിന്നാലെ എക്സൈസ് വകുപ്പും മന്ത്രിയും കടുത്ത പ്രതിരോധത്തിലായിരുന്നു. ഇതിനിടയിലാണ് ജോയിന്റ് കമ്മീഷണർ തന്നെ മുൻ കമ്മീഷണർക്കെതിരെ പരാതിയുമായി രംഗത്തെത്തിയിരിക്കുന്നത്. സംഭവത്തിൽ വിജിലൻസ് അന്വേഷണം ഉടൻ പ്രഖ്യാപിക്കുമെന്നാണ് സൂചന.
