മലപ്പുറത്ത് താൻ ഒരിക്കലും ഓടിച്ചിട്ടില്ലാത്ത സ്കൂട്ടറിന്റെ പേരിൽ പിഴ അടയ്ക്കാൻ നോട്ടീസ് ലഭിച്ച് വാണിയമ്പലം സ്വദേശി. വാണിയമ്പലം കെ.കെ.എസ് നഴ്സറി ഉടമ പി.കെ. മുഹമ്മദ് ജമാലിനാണ് പൂക്കോട്ടുംപാടം പൊലീസിന്റെ പേരിൽ 500 രൂപ പിഴയടക്കണമെന്നാവശ്യപ്പെട്ട് ചലാൻ ലഭിച്ചത്.
ഹെൽമറ്റ് ധരിക്കാതെ സ്കൂട്ടറിൽ യാത്ര ചെയ്തതിനാണ് പിഴ ചുമത്തിയിരിക്കുന്നത്. ഫോട്ടോ സഹിതമുള്ള നോട്ടീസിൽ സ്കൂട്ടറും ഹെൽമറ്റില്ലാതെ യാത്ര ചെയ്യുന്നയാളും വ്യക്തമായി കാണാം. എന്നാൽ, ചിത്രത്തിലുള്ള വാഹനമോ വ്യക്തിയോ ജമാലിന് പരിചയമില്ല.
ചലാനിൽ രേഖപ്പെടുത്തിയിരിക്കുന്നത് ജമാലിന്റെ ഹോണ്ട ഷൈൻ ബൈക്കിന്റെ നമ്പറാണ്. എന്നാൽ, നോട്ടീസിലെ സ്കൂട്ടറിന്റെ നമ്പർ മറ്റൊന്നാണ്.
നിലമ്പൂർ ആർ.ടി ഓഫീസിൽ അന്വേഷിച്ചപ്പോൾ സംഭവം അമരമ്പലത്താണ് നടന്നതെന്നും പൂക്കോട്ടുംപാടം പൊലീസ് സ്റ്റേഷനുമായി ബന്ധപ്പെടണമെന്നും നിർദേശം ലഭിച്ചു. പൊലീസിന്റെ പിഴവാണ് സംഭവത്തിന് കാരണമെന്നാണ് ജമാലിന്റെ ആരോപണം.
പിഴ അടച്ച് പ്രശ്നം പരിഹരിച്ചാലും ഭാവിയിൽ ഇതേ വാഹനവുമായി ബന്ധപ്പെട്ട് വീണ്ടും നടപടികൾ നേരിടേണ്ടിവരുമോ എന്ന ആശങ്കയിലാണ് ജമാൽ.
