പാസ്പോർട്ട് ഇന്ത്യൻ പൗരത്വത്തിന്റെ തെളിവാണോ? വിദേശകാര്യ മന്ത്രാലയത്തിന്റെ ഒരു വിശദീകരണത്തെ തുടർന്ന് രാഷ്ട്രീയ വിവാദം ശക്തമാകുകയാണ്. പാസ്പോർട്ട് പൗരത്വത്തിന്റെ അന്തിമ തെളിവല്ലെന്ന നിലപാട് കേന്ദ്ര സർക്കാർ വൃത്തങ്ങൾ വീണ്ടും വ്യക്തമാക്കി.
പാസ്പോർട്ട് ഒരിക്കലും ഇന്ത്യൻ പൗരത്വത്തിന്റെ അന്തിമ തെളിവായി നിയമപരമായി കണക്കാക്കിയിട്ടില്ലെന്ന് കേന്ദ്ര സർക്കാർ വൃത്തങ്ങൾ വ്യക്തമാക്കി. ഇന്ത്യൻ നിയമങ്ങളിലും വിവിധ കോടതിവിധികളിലും ഈ നിലപാട് വ്യക്തമാക്കിയിട്ടുണ്ടെന്നും സർക്കാർ ചൂണ്ടിക്കാട്ടുന്നു.
വിദേശ രാജ്യങ്ങളിലേക്കുള്ള യാത്രയ്ക്കും അന്താരാഷ്ട്ര തലത്തിൽ ഒരു വ്യക്തിയുടെ ദേശീയത തിരിച്ചറിയുന്നതിനുമുള്ള ഔദ്യോഗിക യാത്രാരേഖയാണ് പാസ്പോർട്ട്. എന്നാൽ, അത് മാത്രം പൗരത്വം തെളിയിക്കുന്ന രേഖയായി കണക്കാക്കാനാകില്ലെന്നാണ് വിദേശകാര്യ മന്ത്രാലയത്തിന്റെ വിശദീകരണം.
പാസ്പോർട്ടിൽ തന്നെ രേഖപ്പെടുത്തിയിരിക്കുന്നതുപോലെ, ഈ രേഖ കേന്ദ്രസർക്കാരിന്റെ ഉടമസ്ഥതയിലുള്ളതാണെന്നും ആവശ്യപ്പെട്ടാൽ അത് സർക്കാരിന് തിരികെ നൽകേണ്ട ബാധ്യത ഉടമസ്ഥനുണ്ടെന്നും മന്ത്രാലയത്തിലെ മുതിർന്ന ഉദ്യോഗസ്ഥർ വ്യക്തമാക്കി. പാസ്പോർട്ട് സേവാ ദിനാചരണത്തോടനുബന്ധിച്ച് നടന്ന പരിപാടിയിലായിരുന്നു ഈ വിശദീകരണം.
അതേസമയം, കേന്ദ്രസർക്കാർ നിലപാടിനെ പ്രതിപക്ഷം രൂക്ഷമായി വിമർശിച്ചു. ഇന്നത്തെ സാഹചര്യത്തിൽ ഇന്ത്യൻ പൗരത്വത്തിന്റെ ഏക തെളിവ് ഹിന്ദുവും ബിജെപി വോട്ടറുമായിരിക്കുക എന്നാണെന്ന് തൃണമൂൽ കോൺഗ്രസ് എംപി മഹുവ മൊയ്ത്ര ആരോപിച്ചു. ഇന്ത്യൻ പൗരത്വം തെളിയിക്കാൻ ഏത് രേഖയാണ് ഉപയോഗിക്കേണ്ടതെന്ന് കോൺഗ്രസ് നേതാവും രാജ്യസഭാ എംപിയുമായ കപിൽ സിബൽ ചോദിച്ചു.
എന്നാൽ, വിദേശകാര്യ മന്ത്രാലയം പുതിയ നയം പ്രഖ്യാപിച്ചിട്ടില്ലെന്നും നിലവിലുള്ള നിയമപരമായ നിലപാട് ആവർത്തിക്കുക മാത്രമാണ് ചെയ്തതെന്നും ബിജെപി പ്രതികരിച്ചു.
